dhuan

vo qahva-ḳhāne meñ aayā

aur hamārī mez ke kināre bin pūchhe hī baiTh gayā

ham bātoñ meñ kho.e hue the

soch rahe the duniyā kyā hai

kyā ye stage hai jis par jīvan kā naTak hotā hai

kyā ham is be-nām Darāme ke haiñ bas farzī kirdār?

uljhī thī apnī guftār

aur achānak vo nau-vārid

cigarette kā ek gahrā sā kash le kar uTThā

ham logoñ ko ġhaur se dekhā

aur ye kah kar jaane lagā

tum sab itnā soch rahe ho

mujh se pūchho duniyā kyā hai

ham ne sochā baat karegā

lekin ek barqī sur.at se vo nau-vārid jā bhī chukā thā

(baire ne batlāyā sāhib! aane vaalā dīvāna thaa)

ab ham log ye soch rahe the

vo to ḳhair ek farzānā thā

lekin ham is fikr ke hāthoñ ik din pāgal ho jā.eñge

cigarette aur kaafī dhueñ meñ uḌ kar bādal ho jā.eñge!!

wo qahwa-KHane mein aaya

aur hamari mez ke kinare bin puchhe hi baiTh gaya

hum baaton mein khoe hue the

soch rahe the duniya kya hai

kya ye stage hai jis par jiwan ka naTak hota hai

kya hum is be-nam Darame ke hain bas farzi kirdar?

uljhi thi apni guftar

aur achanak wo nau-warid

cigarette ka ek gahra sa kash le kar uTTha

hum logon ko ghaur se dekha

aur ye kah kar jaane laga

tum sab itna soch rahe ho

mujh se puchho duniya kya hai

hum ne socha baat karega

lekin ek barqi surat se wo nau-warid ja bhi chuka tha

(baire ne batlaya sahib! aane wala diwana tha)

ab hum log ye soch rahe the

wo to KHair ek farzana tha

lekin hum is fikr ke hathon ek din pagal ho jaenge

cigarette aur kafi dhuen mein uD kar baadal ho jaenge!!