dhup ke sae

shaam dulhan kī tarah

apne rañgoñ meñ nahā.ī huī sharmā.ī huī baiThī hai

gosha-e-chashm se kājal kī syāhī abhī aañsū ban kar

bahte ġhāze meñ nahīñ jazb huī

abhī khoī nahīñ bāloñ kī dil-afroz pareshānī meñ

muskurātī huī sindūr kī maañg

ghulte rañgoñ meñ abhī kāhish-e-jāñ baaqī hai

ghulte rañgoñ kā koī kyā jaane

kab miTeñ kaise miTeñ

shab kī tārīkiyāñ har samt bikhar jaa.eñ to ārām mile

ye chamakte hue zarre na raheñ

zauq-e-tamāshā na rahe

koī tamannā na rahe

ik kiran chhoḌ ke jaatī hī nahīñ

chashm-gīñ kartī huī khel rahī hai ab tak

zard-rū ghaas ke siine pe thiraktī huī baḌh jaatī hai

sañg-rezo kī nigāhoñ meñ chamaktī huī lauT aatī hai

koī samjhā.e use jaao chalī jaao yahāñ ab kyā hai

dhuup ke kāñpte sāyoñ ko zarā baḌhne do

shab kī tārīkiyāñ chhā jaane do

maiñ ne sau baar kahā ek na maanī us ne

muskurātī huī shāḳhoñ pe laraztī hī rahī

yuuñ bhī taḌpāne meñ ik lutf to hai soz to hai

rañg ghulte haiñ ghuleñge āḳhir

ghulte rañgoñ kā koī kyā jaane

kab miTeñ kaise miTeñ

apne rañgoñ meñ nahā.ī huī sharmā.ī huī

shaam dulhan kī tarah baiThī rahī baiThī rahī

sham dulhan ki tarah

apne rangon mein nahai hui sharmai hui baiThi hai

gosha-e-chashm se kajal ki syahi abhi aansu ban kar

bahte ghaze mein nahin jazb hui

abhi khoi nahin baalon ki dil-afroz pareshani mein

muskuraati hui sindur ki mang

ghulte rangon mein abhi kahish-e-jaan baqi hai

ghulte rangon ka koi kya jaane

kab miTen kaise miTen

shab ki tarikiyan har samt bikhar jaen to aaram mile

ye chamakte hue zarre na rahen

zauq-e-tamasha na rahe

koi tamanna na rahe

ek kiran chhoD ke jati hi nahin

chashm-gin karti hui khel rahi hai ab tak

zard-ru ghas ke sine pe thirakti hui baDh jati hai

sang-rezo ki nigahon mein chamakti hui lauT aati hai

koi samjhae use jao chali jao yahan ab kya hai

dhup ke kanpte sayon ko zara baDhne do

shab ki tarikiyan chha jaane do

main ne sau bar kaha ek na mani us ne

muskuraati hui shaKHon pe larazti hi rahi

yun bhi taDpane mein ek lutf to hai soz to hai

rang ghulte hain ghulenge aaKHir

ghulte rangon ka koi kya jaane

kab miTen kaise miTen

apne rangon mein nahai hui sharmai hui

sham dulhan ki tarah baiThi rahi baiThi rahi