Diary

raddī aḳhbār kī tarah

mujhe bech diyā gayā

ek kabāḌī ke hāthoñ

tarāzuoñ meñ tol kar

us ne merī qīmat aañk dī

ḳhūb-sūrat jild

jis par merā unvān likhā thā

us ne noch pheñkī

vazn baḌhāne vaalā gatte kā TukḌā

use qubūl nahīñ thā

maiñ be-nām ho ga.ī

mere aurāq phaḌphaḌā uThe

kasmasā uThe

tab ek bhārī baaT

dhar diyā gayā mujh par

aur maiñ

na.ī taaza havā se

mahrūm ho ga.ī

raddī ke gaTThar ke saath vo kabāḌī

mujhe apne ghar le gayā

vahāñ merā ek ek varaq phāḌā gayā

lifāfe banā.e ga.e

haldī dhaniya aur mirch

rakhne ke liye

māhir uñgliyāñ lifāfe banā rahī thiiñ

mere safhoñ par likhī ibārateñ

TūT-phūT kar sāmne aa rahī thiiñ

kyā ġhazab hai nahīñ insān ko insān kī qadr

har farishte ko ye hasrat hai ki insāñ hotā

laa.ī hayāt aa.e qazā le chalī chale

apnī ḳhushī na aa.e na apnī ḳhushī chale

qaid-o-hayāt-o-band-e-ġham asl meñ donoñ ek haiñ

maut se pahle aadmī ġham se najāt paa.e kyuuñ

āḳhirī varaq ko

ek bachche ne uThā liyā

khel khel meñ havā.ī jahāz banā kar

āsmān meñ uḌā diyā

is par likhā thā

maiñ kahāñ ruktā huuñ arsh-o-farsh kī āvāz se

mujh ko jaanā hai bahut ūñchā had-e-parvāz se

raddi aKHbar ki tarah

mujhe bech diya gaya

ek kabaDi ke hathon

taraazuon mein tol kar

us ne meri qimat aank di

KHub-surat jild

jis par mera unwan likha tha

us ne noch phenki

wazn baDhane wala gatte ka TukDa

use qubul nahin tha

main be-nam ho gai

mere auraq phaDphaDa uThe

kasmasa uThe

tab ek bhaari baT

dhar diya gaya mujh par

aur main

nai taza hawa se

mahrum ho gai

raddi ke gaTThar ke sath wo kabaDi

mujhe apne ghar le gaya

wahan mera ek ek waraq phaDa gaya

lifafe banae gae

haldi dhaniya aur mirch

rakhne ke liye

mahir ungliyan lifafe bana rahi thin

mere safhon par likhi ibaraten

TuT-phuT kar samne aa rahi thin

kya ghazab hai nahin insan ko insan ki qadr

har farishte ko ye hasrat hai ki insan hota

lai hayat aae qaza le chali chale

apni KHushi na aae na apni KHushi chale

qaid-o-hayat-o-band-e-gham asl mein donon ek hain

maut se pahle aadmi gham se najat pae kyun

aaKHiri waraq ko

ek bachche ne uTha liya

khel khel mein hawai jahaz bana kar

aasman mein uDa diya

is par likha tha

main kahan rukta hun arsh-o-farsh ki aawaz se

mujh ko jaana hai bahut uncha had-e-parwaz se