Diary ka ek Khaali safha

maiñ dekh rahā huuñ

ek film jis meñ

logoñ kī niiñd

kisī ne churā lī hai

maiñ khīñch rahā huuñ

ek shab jis meñ

ghuñghrū mere

paañv se alāhida

kar liye ga.e

maiñ DhūñD rahā huuñ

ek na.ī naukrī

jis meñ mujhe

part Time meñ

mohabbat karne

kī ijāzat ho

maiñ chhoḌ rahā huuñ

diary kā ek ḳhālī saf.ha

jis par koī bhī

kuchh bhī likh saktā hai

maiñ chun rahā huuñ

vo patthar jo auratoñ

ko sañgsār karte

hue bach jaate haiñ

maiñ bhuul rahā huuñ vo shaḳhs

jo mujhe tohfe meñ

apnī dīvār de kar mar gayā

maiñ pheñk rahā huuñ

apnā naam us rāste

par jahāñ se kal

merā janāza guzārā

jā.egā

maiñ Draw kar rahā huuñ

ek pahāḌ jis par se kuud

kar maiñ apnī jaan

de dūñgā

main dekh raha hun

ek film jis mein

logon ki nind

kisi ne chura li hai

main khinch raha hun

ek shab jis mein

ghunghru mere

panw se alahida

kar liye gae

main DhunD raha hun

ek nai naukri

jis mein mujhe

part Time mein

mohabbat karne

ki ijazat ho

main chhoD raha hun

diary ka ek KHali safha

jis par koi bhi

kuchh bhi likh sakta hai

main chun raha hun

wo patthar jo auraton

ko sangsar karte

hue bach jate hain

main bhul raha hun wo shaKHs

jo mujhe tohfe mein

apni diwar de kar mar gaya

main phenk raha hun

apna nam us raste

par jahan se kal

mera janaza guzara

jaega

main Draw kar raha hun

ek pahaD jis par se kud

kar main apni jaan

de dunga