dida-e-tar

tum mire koī nahīñ

aur ye nannhī sī jaañ

kaun hai? koī nahīñ

maiñ bhī tum donoñ ko shāyad

ajnabī lagtā huuñ shāyad kuchh nahīñ

ain-mumkin hai ki roz-e-hashr ke imkān se hī qabl ham

apne apne rāstoñ par

roz o shab chalte hue

reg-e-nā-mālūm ke tūfān meñ

aise bichhḌeñ

phir kabhī na mil sakeñ

ye jo lamha baḳht meñ likkhā hai ham sab ke ḳhudā ne

qurb kaa, rañg-e-tamāzat kaa, lahū ke rañg kā

kaash us lamhe meñ ham

band kar leñ apnī āñkhoñ meñ hasīñ chehre shagūfe

qahqahe, raushan sitāre

lahlahāte jism

mauj-e-barq sho.aloñ kā tamavvuj

maut ke, taḳhlīq ke asrār sab

ḳhāna-e-maujūd un sab ke liye

ab hamāre dīda-e-tar ke sivā kuchh bhī nahīñ

rasm-e-ruḳhsat bhī kabhī hogī magar

lamhā-e-benām kī tahvīl meñ

ghar, ye sach hai, muḳhtasar hai

is fanā-anjām jalte muḳhtasar ghar ke sivā kuchh bhī nahīñ

tum mere koi nahin

aur ye nannhi si jaan

kaun hai? koi nahin

main bhi tum donon ko shayad

ajnabi lagta hun shayad kuchh nahin

ain-mumkin hai ki roz-e-hashr ke imkan se hi qabl hum

apne apne raston par

roz o shab chalte hue

reg-e-na-malum ke tufan mein

aise bichhDen

phir kabhi na mil saken

ye jo lamha baKHt mein likkha hai hum sab ke KHuda ne

qurb ka, rang-e-tamazat ka, lahu ke rang ka

kash us lamhe mein hum

band kar len apni aankhon mein hasin chehre shagufe

qahqahe, raushan sitare

lahlahate jism

mauj-e-barq shoalon ka tamawwuj

maut ke, taKHliq ke asrar sab

KHana-e-maujud un sab ke liye

ab hamare dida-e-tar ke siwa kuchh bhi nahin

rasm-e-ruKHsat bhi kabhi hogi magar

lamha-e-benam ki tahwil mein

ghar, ye sach hai, muKHtasar hai

is fana-anjam jalte muKHtasar ghar ke siwa kuchh bhi nahin