دیوانے کی بڑ

کل اک دیوانہ کہتا تھا

اس سال کا دکھ کیا پوچھتے ہو جو گزر گیا

اس سال نے ہم کو بخشے ہیں وہ رنج نئے

جو پہلے کبھی سوچے بھی نہ تھے

اس سال کا دکھ کیسے بھولیں

جس سال نے نفرت جنمی ہے

جس برس نے

رنگ اور مذہب کی ٹکڑی میں دنیا بانٹی ہے

اب دیکھنا ہے یہ سال نیا

کیا نیا سندیسہ لاتا ہے

اس نئے مداری کے جھولے سے

باہر اب کیا آتا ہے

اگلوں نے جو کچھ بویا تھا

وہ آنے والے کاٹتے ہیں

بارود کے ڈھیر پہ بیٹھے ہم

جھوٹے گلدستے بانٹتے ہیں

کل اک دیوانہ بہت ہنسا