diwar-e-chin

kahāñ se phailā huā hai ye silsila kahāñ tak

guzar gayā sail himmatoñ kā

banā ke ye kos kos sadiyoñ kī rahguzar sī

pahāḌ chillā chaḌhī kamānoñ se tiir pheñkeñ

to āsmāñ gir paḌe zamīñ par

ravāñ-davāñ vaqt ke bahāo meñ

ek lambī darāḌ jaise paḌī huī hai

aziim dīvār sar uThā.e khaḌī huī hai

jhuke hue āsmān ke nīche

jo is sahīfe ko aks-dar-aks bāñTtā hai

ye razmiya jo lahū kī shaffāf raushnī se

likhā gayā hai

zamīñ pe chiñgāriyāñ uḌāte hue vo aa.e

jo bāzuoñ se bulandiyoñ kā ḳhirāj

lete rahe

shikam ko anaaj de kar

mashaqqateñ jin kī bāñdiyāñ thiiñ

lahū ke namkīn zā.iqe

raqs karte rahte the

jin ke hoñToñ ke āstāñ par

kaḌaktī āvāz jabr ke chābukoñ kī bijlī

inhī pahāḌoñ pe kauñdtī thī

yahīñ pe mehnat ke naqsh-gar ne

lahū ke paanī meñ sañg gūñdhe

sadā-e-tīsha uThī to kohoñ se phuuT niklīñ

baqā kī nahreñ

zamīñ ko us kī bulandiyoñ kī taraf uThāyā

ufuq ko bāñdhā ufuq se us ne

qadīm quvvat ke raḳhsh ne das hazār lī masāfatoñ meñ

fanā ke tātāriyoñ ke lashkar ko maat de dī

yahīñ pe mehnat ke naqsh-gar ne

siloñ ko pahnā diye salāsil

baTe hue ḳhudgiraft qiloñ kī baaḌ toḌī

isī ne kohoñ ke sar pe gāḌhā

hazīmatoñ nusratoñ kā parcham

kushūd kar ke jise uḌāyā

ka.ī zamānoñ ke vārisoñ ne

jo uḌ rahā hai

nasheb ko āsmāñ kī jānib uḌā rahā hai

jo kal ko kal se milā rahā hai

kahan se phaila hua hai ye silsila kahan tak

guzar gaya sail himmaton ka

bana ke ye kos kos sadiyon ki rahguzar si

pahaD chilla chaDhi kamanon se tir phenken

to aasman gir paDe zamin par

rawan-dawan waqt ke bahao mein

ek lambi daraD jaise paDi hui hai

azim diwar sar uThae khaDi hui hai

jhuke hue aasman ke niche

jo is sahife ko aks-dar-aks banTta hai

ye razmiya jo lahu ki shaffaf raushni se

likha gaya hai

zamin pe chingariyan uDate hue wo aae

jo bazuon se bulandiyon ka KHiraj

lete rahe

shikam ko anaj de kar

mashaqqaten jin ki bandiyan thin

lahu ke namkin zaiqe

raqs karte rahte the

jin ke honTon ke aastan par

kaDakti aawaz jabr ke chabukon ki bijli

inhi pahaDon pe kaundti thi

yahin pe mehnat ke naqsh-gar ne

lahu ke pani mein sang gundhe

sada-e-tisha uThi to kohon se phuT niklin

baqa ki nahren

zamin ko us ki bulandiyon ki taraf uThaya

ufuq ko bandha ufuq se us ne

qadim quwwat ke raKHsh ne das hazar li masafaton mein

fana ke tatariyon ke lashkar ko mat de di

yahin pe mehnat ke naqsh-gar ne

silon ko pahna diye salasil

baTe hue KHudgiraft qilon ki baD toDi

isi ne kohon ke sar pe gaDha

hazimaton nusraton ka parcham

kushud kar ke jise uDaya

kai zamanon ke warison ne

jo uD raha hai

nasheb ko aasman ki jaanib uDa raha hai

jo kal ko kal se mila raha hai