diwar-e-kaba 19 nowember 1989

tū mujhe god meñ le ke yāroñ azīzoñ meñ bāzār-o-daftar ko jaatā

mujhe yaad hai ye

shahr kī niim tārīk galiyoñ meñ aksar maiñ suntā thā ik Dar kī chaap apne pīchhe se aatī

mere bachpan kī shaffāf ma.asūm āñkhoñ meñ nā-mehrbāñ jaane pahchāne chehroñ kā Dar thā

mere dil kā ye shīsha ik an-hone Dar se taḌaḳh sā gayā thā ki jis kī sadā tak nahīñ thī

ye vo Dar thā ki jis kī koī ek tashrīh mumkin nahīñ thī

magar mere kachche se dil meñ

ek āsebī pīpal kī jaḌ thī mujh ko tū ik din inhī meñ akelā chhoḌ degā

jis kī shāḳheñ hirāsāñ nigāhoñ se niklī vo shāḳheñ mujhe bed-e-majnūñ sā larzā.e rakhtīñ

terā siina vo dīvār-e-ka.aba thā jis se chimaT kar maiñ duniyā ke har ġham se begāna hotā

tere mushfiq do lab goyā bāb-e-haram the

vo bosa nahīñ thā halāvat kā dar ik khulā thā

jis se shīrīñ latāfat meñ gūñdhī tamāzat mire din ko tābāñ mirī raat ko garm rakhtī

Dar añdhere kā Dar shahr kī tañg-o-tārīk galiyoñ kā Dar mere bachpan kā hissa rahā hai

Dar vo schōl ke rāste meñ khaḌe ek maj.hūl insāñ kā Dar jis ko ḳhud ham se Dar thā

Dar vo matrūk bālīñ pe Derā kiye kuchh chuḌailoñ kā Dar jo hamesha kā qissa rahā hai

ḳhair ye Dar to bachpan kā hissa hue be-muravvat shanāsā se chehroñ kā Dar hai abhī bhī

mere andar kā sahmā sā bachcha vo dīvār-e-ka.aba abhī DhūñDhtā hai ki jis meñ amaañ thī

aaj daftar salāmat hai bāzār-o-kūche kī raunaq vahī hai

vo dīvār-e-ka.aba magar ab nahīñ hai

maiñ november ke us sard din meñ TheThurtā huuñ ab bhī ki jab tū akelā mujhe kar gayā thā

tu mujhe god mein le ke yaron azizon mein bazar-o-daftar ko jata

mujhe yaad hai ye

shahr ki nim tarik galiyon mein aksar main sunta tha ek Dar ki chap apne pichhe se aati

mere bachpan ki shaffaf masum aankhon mein na-mehrban jaane pahchane chehron ka Dar tha

mere dil ka ye shisha ek an-hone Dar se taDaKH sa gaya tha ki jis ki sada tak nahin thi

ye wo Dar tha ki jis ki koi ek tashrih mumkin nahin thi

magar mere kachche se dil mein

ek aasebi pipal ki jaD thi mujh ko tu ek din inhi mein akela chhoD dega

jis ki shaKHen hirasan nigahon se nikli wo shaKHen mujhe bed-e-majnun sa larzae rakhtin

tera sina wo diwar-e-kaba tha jis se chimaT kar main duniya ke har gham se begana hota

tere mushfiq do lab goya bab-e-haram the

wo bosa nahin tha halawat ka dar ek khula tha

jis se shirin latafat mein gundhi tamazat mere din ko taban meri raat ko garm rakhti

Dar andhere ka Dar shahr ki tang-o-tarik galiyon ka Dar mere bachpan ka hissa raha hai

Dar wo school ke raste mein khaDe ek majhul insan ka Dar jis ko KHud hum se Dar tha

Dar wo matruk baalin pe Dera kiye kuchh chuDailon ka Dar jo hamesha ka qissa raha hai

KHair ye Dar to bachpan ka hissa hue be-murawwat shanasa se chehron ka Dar hai abhi bhi

mere andar ka sahma sa bachcha wo diwar-e-kaba abhi DhunDhta hai ki jis mein aman thi

aaj daftar salamat hai bazar-o-kuche ki raunaq wahi hai

wo diwar-e-kaba magar ab nahin hai

main nowember ke us sard din mein TheThurta hun ab bhi ki jab tu akela mujhe kar gaya tha