dil

ai dil-e-betāb tujh meñ hai sifat sīmāb kī

tere qatroñ meñ haiñ kuchh būñdeñ sharāb-e-nāb kī

tere ā.īne se paidā hai mohabbat kā tilism

terī nairangī meñ poshīda hai hairat kā tilism

sāġhar-e-rangīñ meñ hai kasrat-numā.ī kī jhalak

terī maujoñ ne dikhā.ī hai ḳhudā.ī kī jhalak

naqsh-e-ulfat se numāyāñ ik nayā andāz hai

tū harīm-e-ishq hai yā jalva-gāh-e-nāz hai

tere hisse meñ azal ke din se hai ġham kī fazā

lā-makāñ par jā Thahartī hai tirī āh-e-rasā

tere iimā se hazāroñ ḳhānamāñ-barbād haiñ

tere vīrāne meñ lākhoñ hasrateñ ābād haiñ

kyoñ na ho tere talātum se samundar meñ sukūt

terī maujeñ inqilāb-e-dahr kā haiñ ik subūt

tarz-e-mastī-o-ḳhudī tere gale kā haar hai

tū vo miinā hai ki is se ik jahāñ sarshār hai

ai dil-e-betab tujh mein hai sifat simab ki

tere qatron mein hain kuchh bunden sharab-e-nab ki

tere aaine se paida hai mohabbat ka tilism

teri nairangi mein poshida hai hairat ka tilism

saghar-e-rangin mein hai kasrat-numai ki jhalak

teri maujon ne dikhai hai KHudai ki jhalak

naqsh-e-ulfat se numayan ek naya andaz hai

tu harim-e-ishq hai ya jalwa-gah-e-naz hai

tere hisse mein azal ke din se hai gham ki faza

la-makan par ja Thaharti hai teri aah-e-rasa

tere ima se hazaron KHanaman-barbaad hain

tere virane mein lakhon hasraten aabaad hain

kyon na ho tere talatum se samundar mein sukut

teri maujen inqilab-e-dahr ka hain ek subut

tarz-e-masti-o-KHudi tere gale ka haar hai

tu wo mina hai ki is se ek jahan sarshaar hai