dil-e-safi

dil-e-sāfī ye ho ai 'mehr' ḳhudā kī rahmat

maiñ ne mahsūs kiyā hai bahut ārām yahāñ

gosha-e-āfat us ko kahīñ to zebā hai

kaisī taskīn kā hai kaise sukūñ kā ye makāñ

is tarah shahar se kuchh duur koī ma.abad ho

shāra-e-ām se haT kar ki na ho bhiiḌ vahāñ

koī jaa.e bhī jo us jā to irāda kar ke

ye na ho har kas-o-nā-kas ho vahāñ gasht-kunāñ

jaa.e tanhā ho makāñ gosha-e-uzlat sā ho

jis taraf dekho nazar aa.e ḳhamoshī kā samāñ

sāya-e-afgan huuñ kuhan saal daraḳht us jā par

aisī ThanDak ho ki bas aa.e vahāñ jaan meñ jaan

sahn meñ āb-e-musaffā paḌā hauz bhī ho

aur vo aisā maskan ki na ho jis kā bayāñ

girah meñ huuñ rausheñ besh-bahā patthar kī

saaf aisī ki na ratankā bhī nazar aa.e vahāñ

sāmne aañkh ke ma.abad kā ho burj-e-sañgīñ

jis kī ta.amīr ko barsoñ hue hoñ yā sadiyāñ

ġharaz aisā ho makāñ aur to vaañ baiThā ho

aur ḳhamoshī o sukūñ chaar taraf se ho ayaañ

tū vahāñ baiThā ho ārām se aur tere sivā

ādmī-zād kā DhūñDhe na nazar aa.e nishāñ

dekh kar aañkh meñ nuur tabī.at meñ surūr

to ye samjhe ki zamīñ par hai yahī bāġh-e-jināñ

hai yahī haal jo dekho to dil saafī kā

vahī taskīn-o-sukūñ aur vahī rāhat hai yahāñ

vahī ThanDak hai vahī nūr-o-surūr-o-maufūr

hai yahāñ bhī vahī taskīn-o-ḳhamoshī kā samāñ

maiñ yahāñ baiTh ke ai 'mehr' maze letā huuñ

aur samajhtā huuñ zamīñ par hai yahī bāġh-e-jināñ

dil-e-safi ye ho ai 'mehr' KHuda ki rahmat

main ne mahsus kiya hai bahut aaram yahan

gosha-e-afat us ko kahin to zeba hai

kaisi taskin ka hai kaise sukun ka ye makan

is tarah shahar se kuchh dur koi mabad ho

shaara-e-am se haT kar ki na ho bhiD wahan

koi jae bhi jo us ja to irada kar ke

ye na ho har kas-o-na-kas ho wahan gasht-kunan

jae tanha ho makan gosha-e-uzlat sa ho

jis taraf dekho nazar aae KHamoshi ka saman

saya-e-afgan hun kuhan sal daraKHt us ja par

aisi ThanDak ho ki bas aae wahan jaan mein jaan

sahn mein aab-e-musaffa paDa hauz bhi ho

aur wo aisa maskan ki na ho jis ka bayan

girah mein hun raushen besh-baha patthar ki

saf aisi ki na ratanka bhi nazar aae wahan

samne aankh ke mabad ka ho burj-e-sangin

jis ki tamir ko barson hue hon ya sadiyan

gharaz aisa ho makan aur to wan baiTha ho

aur KHamoshi o sukun chaar taraf se ho ayan

tu wahan baiTha ho aaram se aur tere siwa

aadmi-zad ka DhunDhe na nazar aae nishan

dekh kar aankh mein nur tabiat mein surur

to ye samjhe ki zamin par hai yahi bagh-e-jinan

hai yahi haal jo dekho to dil safi ka

wahi taskin-o-sukun aur wahi rahat hai yahan

wahi ThanDak hai wahi nur-o-surur-o-maufur

hai yahan bhi wahi taskin-o-KHamoshi ka saman

main yahan baiTh ke ai 'mehr' maze leta hun

aur samajhta hun zamin par hai yahi bagh-e-jinan