dil-o-dimagh ko ro lunga aah kar lunga

dil-o-dimāġh ko ro lūñgā aah kar lūñgā

tumhāre ishq meñ sab kuchh tabāh kar lūñgā

agar mujhe na milīñ tum tumhāre sar kī qasam

maiñ apnī saarī javānī tabāh kar lūñgā

mujhe jo dair-o-haram meñ kahīñ jagah na milī

tire ḳhayāl hī ko sajda-gāh kar lūñgā

jo tum se kar diyā mahrūm āsmāñ ne mujhe

maiñ apnī zindagī sarf-e-gunāh kar lūñgā

raqīb se bhī milūñgā tumhāre hukm pe maiñ

jo ab talak na kiyā thā ab aah kar lūñgā

tumhārī yaad meñ maiñ kaaT dūñgā hashr se din

tumhāre hijr meñ rāteñ siyāh kar lūñgā

savāb ke liye ho jo gunah vo ain savāb

ḳhudā ke naam pe bhī ik gunāh kar lūñgā

harīm-e-hazrat-e-salmā kī samt jaatā huuñ

huā na zabt to chupke se aah kar lūñgā

ye nau-bahār ye abrū, havā ye rañg sharāb

chalo jo ho so ho ab to gunāh kar lūñgā

kisī hasīne ke ma.asūm ishq meñ 'aḳhtar'

javānī kyā hai maiñ sab kuchh tabāh kar lūñgā

dil-o-dimagh ko ro lunga aah kar lunga

tumhaare ishq mein sab kuchh tabah kar lunga

agar mujhe na milin tum tumhaare sar ki qasam

main apni sari jawani tabah kar lunga

mujhe jo dair-o-haram mein kahin jagah na mili

tere KHayal hi ko sajda-gah kar lunga

jo tum se kar diya mahrum aasman ne mujhe

main apni zindagi sarf-e-gunah kar lunga

raqib se bhi milunga tumhaare hukm pe main

jo ab talak na kiya tha ab aah kar lunga

tumhaari yaad mein main kaT dunga hashr se din

tumhaare hijr mein raaten siyah kar lunga

sawab ke liye ho jo gunah wo ain sawab

KHuda ke nam pe bhi ek gunah kar lunga

harim-e-hazrat-e-salma ki samt jata hun

hua na zabt to chupke se aah kar lunga

ye nau-bahaar ye abru, hawa ye rang sharab

chalo jo ho so ho ab to gunah kar lunga

kisi hasine ke masum ishq mein 'aKHtar'

jawani kya hai main sab kuchh tabah kar lunga