dilip-kumar

are hero!

adākārī na kar chal uTh

ki lākhoñ dil tirī āñkhoñ se dhaḌkan lene aa.e haiñ

chalo maanā tirī āñkheñ kuchh aisī thiiñ

ki is be-kār sayyāre pe un kā der tak rahnā

na bantā thā

magar pyāre!

tirī āñkhoñ kī ruḳhsat raushnī kī haar hī to hai

tū kyoñ ḳhāmosh hai kuchh kah

ki terī be-karāñ āvāz meñ to lākhoñ sadiyoñ kī sadā.eñ thiiñ

tire chehre kā har gahrā ta.assur aisā charḳha thā

ki jis par apne jazbe kāḌhte the ham

so is charḳhe kī kuuk ab kis liye chup hai

kahānī kā hidāyat-kār bhī shāyad tirī āñkhoñ kī gahrā.ī se ḳhā.if thā

vo mil jaa.e to boleñge

ki is kirdār kā jaanā na bantā thaa!

chal āñkheñ khol tujh se milne lākhoñ log aa.e haiñ

kisī ko bhī yaqīñ aatā nahīñ hai tere jaane kā

unheñ lagtā hai un ke rote rote tū uThegā aur kahegā:

ġham nahīñ karnā

guloñ kī zindagānī maut se kab ḳhatm hotī hai

mohabbat kī kahānī maut se kab ḳhatm hotī hai

are hero!

adakari na kar chal uTh

ki lakhon dil teri aankhon se dhaDkan lene aae hain

chalo mana teri aankhen kuchh aisi thin

ki is be-kar sayyare pe un ka der tak rahna

na banta tha

magar pyare!

teri aankhon ki ruKHsat raushni ki haar hi to hai

tu kyon KHamosh hai kuchh kah

ki teri be-karan aawaz mein to lakhon sadiyon ki sadaen thin

tere chehre ka har gahra tassur aisa charKHa tha

ki jis par apne jazbe kaDhte the hum

so is charKHe ki kuk ab kis liye chup hai

kahani ka hidayat-kar bhi shayad teri aankhon ki gahrai se KHaif tha

wo mil jae to bolenge

ki is kirdar ka jaana na banta tha!

chal aankhen khol tujh se milne lakhon log aae hain

kisi ko bhi yaqin aata nahin hai tere jaane ka

unhen lagta hai un ke rote rote tu uThega aur kahega:

gham nahin karna

gulon ki zindagani maut se kab KHatm hoti hai

mohabbat ki kahani maut se kab KHatm hoti hai