dilip-kumar ki aaKHiri KHwahish

le chalo dosto

le chalo qissa-ḳhvānī ke bāzār meñ

us mohalle ḳhudā-dād kī ik shikasta galī ke muqaffal makāñ meñ

ki muddat se vīrāñ kueñ kī zamīñ chāTtī pyaas ko dekh kar apnī tishna-labī bhuul jā.ūñ

ġhuTarġhūñ kī āvāz Darboñ se aatī huī sun ke

koThe pe jā.ūñ kabūtar uḌā.ūñ

kisī baaġh se ḳhushk mevoñ kī sauġhāt le kar sadā.eñ lagā.ūñ

zabānoñ ke roġhan ko zaitūn ke zā.iqe se milā.ūñ

jamī sardiyoñ meñ galī ke usī taḳht par narm kirnoñ se chehre pe surḳhī sajā.ūñ

ki yāroñ kī un Toliyoñ meñ na.ī dāstāneñ sunā.ūñ

unhī pān-dānoñ se laalī churā.ūñ

mujhe un purānī sī rāhoñ meñ phir le chalo dosto

haañ mujhe le chalo us basantī dulārī madhu kī galī meñ

ki ḳhvāboñ kī vo raushnī aaj bhī merī āñkhoñ meñ ābād hai

mere kānoñ meñ us ke tarannum kī ghanTī

sahīfoñ kī sūrat utārī ga.ī hai

sabhī ko bulāo ki naġhma-sarā.ī kā ye marhala āḳhirī hai

bulāo mire raaj ko

āḳhirī shab hai

phir se hasīnoñ ke jhurmuT meñ bas āḳhirī ghūñT pī ke

fanā ghāTiyoñ meñ

maiñ yuuñ phail jā.ūñ ki vāpas na aa.uuñ

suno dosto

le chalo dosto

le chalo qissa-KHwani ke bazar mein

us mohalle KHuda-dad ki ek shikasta gali ke muqaffal makan mein

ki muddat se viran kuen ki zamin chaTti pyas ko dekh kar apni tishna-labi bhul jaun

ghuTarghun ki aawaz Darbon se aati hui sun ke

koThe pe jaun kabutar uDaun

kisi bagh se KHushk mewon ki saughat le kar sadaen lagaun

zabanon ke roghan ko zaitun ke zaiqe se milaun

jami sardiyon mein gali ke usi taKHt par narm kirnon se chehre pe surKHi sajaun

ki yaron ki un Toliyon mein nai dastanen sunaun

unhi pan-danon se lali churaun

mujhe un purani si rahon mein phir le chalo dosto

han mujhe le chalo us basanti dulari madhu ki gali mein

ki KHwabon ki wo raushni aaj bhi meri aankhon mein aabaad hai

mere kanon mein us ke tarannum ki ghanTi

sahifon ki surat utari gai hai

sabhi ko bulao ki naghma-sarai ka ye marhala aaKHiri hai

bulao mere raj ko

aaKHiri shab hai

phir se hasinon ke jhurmuT mein bas aaKHiri ghunT pi ke

fana ghaTiyon mein

main yun phail jaun ki wapas na aaun

suno dosto