dilli ki galiyan tin manzar

pahlā manzar

san unnīs sau aḌtīs hai

sardī kī ThiThurī rāteñ haiñ

raat ke koī aaTh baje haiñ

aaj ye sab guzrī bāteñ haiñ

morī darvāze ke bāhar

nashe meñ dhut faujī gore

añgrezī sarkār ke chhore

tāñge vāloñ ko piiT rahe haiñ

tāñge vaale ghabrā ghabrā kar

idhar-udhar sab bhaag rahe haiñ

aur sipāhī aañkh churā kar

dūsrī jānib dekh rahe haiñ

chalte chalte raah meñ ruk kar

maiñ ye manzar dekh rahā huuñ

dūsrā manzar

fat.h-purī masjid ke aage

chandni-chowk kā lambā rasta

lāl-qil.e tak le jaatā hai

haath meñ thāme apnā basta

maiñ maktab kī samt ravāñ huuñ

shāhjahāñ ke lāl-qil.e par

goroñ kā pahrā baiThā hai

chandni-chowk meñ dā.eñ-bā.eñ

galiyoñ kūchoñ bāzāroñ meñ

bijlī ke khamboñ par har-sū

Dheroñ laḌke chaḌhe hue haiñ

aur tāroñ ko kaaT rahe haiñ

police golī chalā rahī hai

chalte chalte raah meñ ruk kar

maiñ ye manzar dekh rahā huuñ

tīsrā manzar

gore london chale ga.e haiñ

māñgeñ puurī ho ga.iiñ aaj

netā rāh-numā sab ḳhush haiñ

mulk ne paayā hai svārāj

lāl-qil.e par āzādī kā

sah-rañgā parcham lahrāyā

dillī kī galiyoñ meñ sab ne

āzādī kā jashn manāyā

lekin ekā-ekī jaise

parda uTThā manzar badlā

dhuñd sī chhā.ī hai har jānib

jo kuchh hai sab gadlā gadlā

koī nahīñ suntā hai kisī kī

ho ga.e log achānak bahre

railoñ meñ be-sar kī lāsheñ

saḌkoñ par be-dhaḌ ke chehre

harījan bastī kī kuTiyā meñ

ḳhuun se lat-pat lahūluhān

kuTiyā jaise ik shamshān

gāñdhī jī kī laash paḌī hai

āzādī kuchh duur khaḌī hai

pahla manzar

san unnis sau aDtis hai

sardi ki ThiThuri raaten hain

raat ke koi aaTh baje hain

aaj ye sab guzri baaten hain

mori darwaze ke bahar

nashe mein dhut fauji gore

angrezi sarkar ke chhore

tange walon ko piT rahe hain

tange wale ghabra ghabra kar

idhar-udhar sab bhag rahe hain

aur sipahi aankh chura kar

dusri jaanib dekh rahe hain

chalte chalte rah mein ruk kar

main ye manzar dekh raha hun

dusra manzar

fath-puri masjid ke aage

chandni-chowk ka lamba rasta

lal-qile tak le jata hai

hath mein thame apna basta

main maktab ki samt rawan hun

shahjahan ke lal-qile par

goron ka pahra baiTha hai

chandni-chowk mein daen-baen

galiyon kuchon bazaron mein

bijli ke khambon par har-su

Dheron laDke chaDhe hue hain

aur taron ko kaT rahe hain

police goli chala rahi hai

chalte chalte rah mein ruk kar

main ye manzar dekh raha hun

tisra manzar

gore london chale gae hain

mangen puri ho gain aaj

neta rah-numa sab KHush hain

mulk ne paya hai swaraj

lal-qile par aazadi ka

sah-ranga parcham lahraya

dilli ki galiyon mein sab ne

aazadi ka jashn manaya

lekin eka-eki jaise

parda uTTha manzar badla

dhund si chhai hai har jaanib

jo kuchh hai sab gadla gadla

koi nahin sunta hai kisi ki

ho gae log achanak bahre

railon mein be-sar ki lashen

saDkon par be-dhaD ke chehre

harijan basti ki kuTiya mein

KHun se lat-pat lahuluhan

kuTiya jaise ek shamshan

gandhi ji ki lash paDi hai

aazadi kuchh dur khaDi hai