dilli se wapsi

ruḳhsat ai dillī tirī mahfil se ab jaatā huuñ maiñ

nauhagar jaatā huuñ maiñ nāla-ba-lab jaatā huuñ maiñ

yaad ā.eñge mujhe tere zamīn-o-āsmāñ

rah chuke haiñ merī jaulāñ-gāh tere bostāñ

terā dil dhaḌkā chuke haiñ mere ehsāsāt bhī

tere aivānoñ meñ gūñje haiñ mire naġhmāt bhī

rashk-e-shīrāz-kuhan hindostāñ kī aabrū

sar-zamīn-e-husn-o-mausīqī bahisht-e-rañg-o-bū

ma.abad-e-husn-o-mohabbat bārgāh-e-soz-o-sāz

tere but-ḳhāne hasīñ tere kalīsā dil-navāz

zikr yūsuf kā to kyā kiije tirī sarkār meñ

ḳhud zuleḳhā aa ke biktī hai tire bāzār meñ

jannateñ ābād haiñ tere dar-o-dīvār meñ

aur tū ābād ḳhud shā.ir ke qalb-e-ār meñ

mahfil-e-sāqī salāmat bazm-e-anjum barqarār

nāznīnān-e-haram par rahmat-e-parvardigār

yaad aa.egī mujhe be-tarah yaad aa.egī tū

ain vaqt-e-mai-kashī āñkhoñ meñ phir jā.egī tū

kyā kahūñ kis shauq se aayā thā terī bazm meñ

chhoḌ kar ḳhuld-e-alī-gaḌh kī hazāroñ mahfileñ

kitne rañgīñ ahd-o-paimāñ toḌ kar aayā thā maiñ

dil navāzān-e-chaman kā chhoḌ kar aayā thā maiñ

ik nasheman maiñ ne chhoḌā ik nasheman chhuT gayā

saaz bas chheḌā hī thā maiñ ne ki gulshan chhuT gayā

dil meñ soz-e-ġham kī ik duniyā liye jaatā huuñ maiñ

aah tere mai-kade se be-piye jaatā huuñ maiñ

jaate jaate lekin ik paimāñ kiye jaatā huuñ maiñ

apne azm-e-sarfaroshī kī qasam khātā huuñ maiñ

phir tirī bazm-e-hasīñ meñ lauT kar ā.ūñgā maiñ

ā.ūñgā maiñ aur ba-andāz-e-digar ā.ūñgā maiñ

aah vo chakkar diye haiñ gardish-e-ayyām ne

khol kar rakh dī haiñ āñkheñ talḳhī-e-ālām ne

fitrat-e-dil dushman-e-naġhma huī jaatī hai ab

zindagī ik barq ik sho.ala huī jaatī hai ab

sar se pā tak ek ḳhūnīñ raag ban kar ā.ūñgā

lāla-zār-e-rañg-o-bū meñ aag ban kar ā.ūñgā

ruKHsat ai dilli teri mahfil se ab jata hun main

nauhagar jata hun main nala-ba-lab jata hun main

yaad aaenge mujhe tere zamin-o-asman

rah chuke hain meri jaulan-gah tere bostan

tera dil dhaDka chuke hain mere ehsasat bhi

tere aiwanon mein gunje hain mere naghmat bhi

rashk-e-shiraaz-kuhan hindostan ki aabru

sar-zamin-e-husn-o-mausiqi bahisht-e-rang-o-bu

mabad-e-husn-o-mohabbat bargah-e-soz-o-saz

tere but-KHane hasin tere kalisa dil-nawaz

zikr yusuf ka to kya kije teri sarkar mein

KHud zuleKHa aa ke bikti hai tere bazar mein

jannaten aabaad hain tere dar-o-diwar mein

aur tu aabaad KHud shair ke qalb-e-ar mein

mahfil-e-saqi salamat bazm-e-anjum barqarar

nazninan-e-haram par rahmat-e-parwardigar

yaad aaegi mujhe be-tarah yaad aaegi tu

ain waqt-e-mai-kashi aankhon mein phir jaegi tu

kya kahun kis shauq se aaya tha teri bazm mein

chhoD kar KHuld-e-ali-gaDh ki hazaron mahfilen

kitne rangin ahd-o-paiman toD kar aaya tha main

dil nawazan-e-chaman ka chhoD kar aaya tha main

ek nasheman main ne chhoDa ek nasheman chhuT gaya

saz bas chheDa hi tha main ne ki gulshan chhuT gaya

dil mein soz-e-gham ki ek duniya liye jata hun main

aah tere mai-kade se be-piye jata hun main

jate jate lekin ek paiman kiye jata hun main

apne azm-e-sarfaroshi ki qasam khata hun main

phir teri bazm-e-hasin mein lauT kar aaunga main

aaunga main aur ba-andaz-e-digar aaunga main

aah wo chakkar diye hain gardish-e-ayyam ne

khol kar rakh di hain aankhen talKHi-e-alam ne

fitrat-e-dil dushman-e-naghma hui jati hai ab

zindagi ek barq ek shoala hui jati hai ab

sar se pa tak ek KHunin rag ban kar aaunga

lala-zar-e-rang-o-bu mein aag ban kar aaunga