din ke rup mein raat kahani

raat ke phaile añdhere meñ koī saaya nahīñ

jhilmilāte hue kamzor sitāre ye kahe jaate haiñ

chāñd aa.egā to saa.e bhī chale ā.eñge

raat ke phaile añdhere meñ koī saaya nahīñ hotā hai

raat ik baat hai sadiyoñ kī ka.ī sadiyoñ kī

yā kisī pichhle janam kī hogī

raat ke phaile añdhere haiñ koī saaya na thā

raat kā phailā añdherā muhtāj

ik bhikārī thā usī pahlī kiran kā jo larazte hue aatī hai jagā detī hai

so.e sāyoñ ko uThā detī hai bedārī meñ

ziist ke hilte hue jhūmte āsār nazar aate haiñ

ziist se pahle magar baat koī aur hī thī

raat ke phaile añdhere meñ koī saaya na thā

chāñd ke aane pe saa.e aa.e

us ke bikhre hue gesū saa.e

laaj kī mīThī jhijak bhī saaya

aur bhī saa.e the halke gahre

kaalī āñkhoñ kī ghanerī palkeñ

apne āġhosh meñ sāyoñ ko liye baiThī thiiñ

aur un sāyoñ meñ mahsūs huā kartā thā

dil kā ġham dil kī ḳhalish dil kī tamannā har shai

ek saaya hai laraztā saaya

aur mujhe dekhne par us kī ghanerī chup-chāp

ek saaya hī nazar aatī thī

aisā ik saaya jo ḳhāmosh rahā kartā ho

aur use dekhte hī maiñ bhī to ik saaya hī ban jaatā thā

saaya ḳhāmosh rahā kartā hai

aur ik larzish-e-betāb ke hone pe bhī ḳhāmoshī hī

raah meñ merī ināñ-gīr huā kartī thī

us ke bikhre hue gesū saa.e

laaj kī mīThī jhijak bhī saaya

aur bhī saa.e the halke gahre

kaalī āñkhoñ kī ghanerī palkeñ

apne āġhosh meñ sāyoñ ko liye baiThī thiiñ

aur un sāyoñ meñ mahsūs huā kartā thā

dil kā ġham dil kī ḳhalish dil kī tamannā har shai

ek saaya hai laraztā saaya

aur mujhe dekhne par us kī ghanerī chup-chāp

ek saaya hī nazar aatī thī

aisā ik saaya jo ḳhāmosh rahā kartā ho

aur use dekhte hī maiñ bhī to ik saaya hī ban jaatā thā

saaya ḳhāmosh rahā kartā hai

aur ik larzish-e-betāb ke hone par bhī ḳhāmoshī hī

raah meñ merī ināñ-gīr huā kartī thī

sīdhā jaatā huā rasta bhī to ik saaya thā

us pe aate hue jaate hue insān tamām

dhuñdle saa.e the magar saa.e the

maiñ bhī jaatā huā aatā huā ik saaya thā

maiñ bhī ik saaya thā kis kā saaya

kis ke qadmoñ se lipaTte hue chup-chāp chalā jaatā thā

kah to duuñ dil meñ ye ġhamnāk ḳhayāl aatā hai

saaya ḳhāmosh rahā kartā hai

raat ke saa.e hī ḳhāmosh rahā karte haiñ

din ke saa.e to kahā karte haiñ

biitī lazzat kī kahānī se

aur mirī mastī bhī ab din kā hī ik saaya hai

jis ke ek kināre ko shuā sozāñ

apnī shiddat se jalāne pe miTāne pe tulī baiThī hai

kaash aa jaa.e ghaTā chhā.e ghaTā aur ban jaa.e

chaḌhte sūraj kā zavāl

chaḌhtā sūraj ye batā detā hai

baḌhte saa.e haiñ kisī ke ġhammāz

bahte bahte ye kahe jaate haiñ

raat ke jaage hue so.e hue uThe haiñ

dhuup khāte hue laTke laTke

jab koī pairahan āvezāñ

ek jhoñke se laraz uThtā hai

ham-navā.ī ko laraztā huā saaya bhī kahe jaatā hai

biitī lazzat kī kahānī sab se

biitī lazzat bhī mire vāste ik saaya hai

kisī sūraj ke tale aate hue bādal kā

sarsarāte hue jhoñke kī tarah aatā huā jaatā huā

bāteñ karne ko vo ik pal bhī nahīñ ruktā thā

din kā saaya thā use raat kī ik baat bhī ma.alūm na thī

raat ik baat hai sadiyoñ kī ka.ī sadiyoñ kī

aur ab din hai mujhe saa.e nazar aate haiñ

bolte saa.e nazar aate haiñ

jaane pahchāne haiñ phir bhī na.e mafhūm samjhāte haiñ samjhāte hī chale jaate haiñ

phir palaT aate haiñ

jaise maiñ jaatā thā aur jā ke palaT aatā thā

isī raste pe jo ik saaya thā

rāsta aaj bhī saaya hai magar ik nayā saaya hai

raah meñ ek makān

vo bhī saaya hai udāsī kā ghanerā sunsān

raah meñ aatī huī har mūrat

ek saaya hai chuḌail

huur kā us meñ koī aks nazar aatā nahīñ

dekhte hī jise maiñ kaañp uThā kartā huuñ

āñkhoñ meñ ḳhuun utar aatā hai

sāmne dhuñd sī chhā jaatī hai

dil dhaḌaktā hī chalā jaatā hai

aur maiñ dekhtā huuñ

saa.e milte hue ghulte hue kuchh bhuut se ban jaate haiñ

hinhināte hue hañste haiñ pukār uThte haiñ

dil meñ kyā dhyān yahī hai ab bhī

dil meñ kyā dhyān yahī hai ab bhī

saaya ḳhāmosh rahā kartā hai

dekh ham bolte haiñ bolte saa.e haiñ tamām

ham se bach tū kahāñ jā.egā

aur maiñ kaañp uThā kartā huuñ

aur vo bolte haiñ

kaañp uThā hai laraztā hai ye buzdil nākām

baat kartā hī nahīñ hai koī

ab bhī shāyad ye samajhtā hai larazte dil meñ

saaya ḳhāmosh rahā kartā hai

raat ke phaile andhere mein koi saya nahin

jhilmilate hue kamzor sitare ye kahe jate hain

chand aaega to sae bhi chale aaenge

raat ke phaile andhere mein koi saya nahin hota hai

raat ek baat hai sadiyon ki kai sadiyon ki

ya kisi pichhle janam ki hogi

raat ke phaile andhere hain koi saya na tha

raat ka phaila andhera muhtaj

ek bhikari tha usi pahli kiran ka jo larazte hue aati hai jaga deti hai

soe sayon ko uTha deti hai bedari mein

zist ke hilte hue jhumte aasar nazar aate hain

zist se pahle magar baat koi aur hi thi

raat ke phaile andhere mein koi saya na tha

chand ke aane pe sae aae

us ke bikhre hue gesu sae

laj ki miThi jhijak bhi saya

aur bhi sae the halke gahre

kali aankhon ki ghaneri palken

apne aaghosh mein sayon ko liye baiThi thin

aur un sayon mein mahsus hua karta tha

dil ka gham dil ki KHalish dil ki tamanna har shai

ek saya hai larazta saya

aur mujhe dekhne par us ki ghaneri chup-chap

ek saya hi nazar aati thi

aisa ek saya jo KHamosh raha karta ho

aur use dekhte hi main bhi to ek saya hi ban jata tha

saya KHamosh raha karta hai

aur ek larzish-e-betab ke hone pe bhi KHamoshi hi

rah mein meri inan-gir hua karti thi

us ke bikhre hue gesu sae

laj ki miThi jhijak bhi saya

aur bhi sae the halke gahre

kali aankhon ki ghaneri palken

apne aaghosh mein sayon ko liye baiThi thin

aur un sayon mein mahsus hua karta tha

dil ka gham dil ki KHalish dil ki tamanna har shai

ek saya hai larazta saya

aur mujhe dekhne par us ki ghaneri chup-chap

ek saya hi nazar aati thi

aisa ek saya jo KHamosh raha karta ho

aur use dekhte hi main bhi to ek saya hi ban jata tha

saya KHamosh raha karta hai

aur ek larzish-e-betab ke hone par bhi KHamoshi hi

rah mein meri inan-gir hua karti thi

sidha jata hua rasta bhi to ek saya tha

us pe aate hue jate hue insan tamam

dhundle sae the magar sae the

main bhi jata hua aata hua ek saya tha

main bhi ek saya tha kis ka saya

kis ke qadmon se lipaTte hue chup-chap chala jata tha

kah to dun dil mein ye ghamnak KHayal aata hai

saya KHamosh raha karta hai

raat ke sae hi KHamosh raha karte hain

din ke sae to kaha karte hain

biti lazzat ki kahani se

aur meri masti bhi ab din ka hi ek saya hai

jis ke ek kinare ko shua sozan

apni shiddat se jalane pe miTane pe tuli baiThi hai

kash aa jae ghaTa chhae ghaTa aur ban jae

chaDhte suraj ka zawal

chaDhta suraj ye bata deta hai

baDhte sae hain kisi ke ghammaz

bahte bahte ye kahe jate hain

raat ke jage hue soe hue uThe hain

dhup khate hue laTke laTke

jab koi pairahan aawezan

ek jhonke se laraz uThta hai

ham-nawai ko larazta hua saya bhi kahe jata hai

biti lazzat ki kahani sab se

biti lazzat bhi mere waste ek saya hai

kisi suraj ke tale aate hue baadal ka

sarsaraate hue jhonke ki tarah aata hua jata hua

baaten karne ko wo ek pal bhi nahin rukta tha

din ka saya tha use raat ki ek baat bhi malum na thi

raat ek baat hai sadiyon ki kai sadiyon ki

aur ab din hai mujhe sae nazar aate hain

bolte sae nazar aate hain

jaane pahchane hain phir bhi nae mafhum samjhate hain samjhate hi chale jate hain

phir palaT aate hain

jaise main jata tha aur ja ke palaT aata tha

isi raste pe jo ek saya tha

rasta aaj bhi saya hai magar ek naya saya hai

rah mein ek makan

wo bhi saya hai udasi ka ghanera sunsan

rah mein aati hui har murat

ek saya hai chuDail

hur ka us mein koi aks nazar aata nahin

dekhte hi jise main kanp uTha karta hun

aankhon mein KHun utar aata hai

samne dhund si chha jati hai

dil dhaDakta hi chala jata hai

aur main dekhta hun

sae milte hue ghulte hue kuchh bhut se ban jate hain

hinhinate hue hanste hain pukar uThte hain

dil mein kya dhyan yahi hai ab bhi

dil mein kya dhyan yahi hai ab bhi

saya KHamosh raha karta hai

dekh hum bolte hain bolte sae hain tamam

hum se bach tu kahan jaega

aur main kanp uTha karta hun

aur wo bolte hain

kanp uTha hai larazta hai ye buzdil nakaam

baat karta hi nahin hai koi

ab bhi shayad ye samajhta hai larazte dil mein

saya KHamosh raha karta hai