diwali ki sham

chhup gayā ḳhurshīd-e-tābāñ aa.ī dīvālī kī shaam

har taraf jashn-e-charāġhāñ kā hai kaisā ehtimām

DevḌhiyoñ par shādyāne aish ke bajne lage

aur rañgīñ qumqumoñ se bām-o-dar sajne lage

itr-o-ambar se havā hai kis qadar mahkī huī

ḳhushnumā mahtābiyoñ se hai fazā dahkī huī

phuljhaḌī se phuul yuuñ jhaḌte haiñ jaise kahkashāñ

har taraf phailā fazā meñ hai paTāḳhoñ kā dhuāñ

kyā maze kī ātish-afshānī hai agnī-bān kī

dekh kar ash-ash kare jis ko nazar insān kī

haiñ sitāroñ kī ye laḌiyāñ yā charāġhoñ kī qatār

kūcha-o-bāzār ke dīvār-o-dar haiñ nūr-bār

baḌh rahā hai sūrat-e-sailāb logoñ kā hujūm

har dukāñ par gāhakoñ kā shor-o-ġhul hai bil-umūm

raushnī ban kar ḳhushī har samt hai chhā.ī huī

ek ḳhilqat jis ke jalvoñ kī tamāshā.ī huī

chhup gaya KHurshid-e-taban aai diwali ki sham

har taraf jashn-e-charaghan ka hai kaisa ehtimam

DewDhiyon par shadyane aish ke bajne lage

aur rangin qumqumon se baam-o-dar sajne lage

itr-o-ambar se hawa hai kis qadar mahki hui

KHushnuma mahtabiyon se hai faza dahki hui

phuljhaDi se phul yun jhaDte hain jaise kahkashan

har taraf phaila faza mein hai paTaKHon ka dhuan

kya maze ki aatish-afshani hai agni-ban ki

dekh kar ash-ash kare jis ko nazar insan ki

hain sitaron ki ye laDiyan ya charaghon ki qatar

kucha-o-bazar ke diwar-o-dar hain nur-bar

baDh raha hai surat-e-sailab logon ka hujum

har dukan par gahakon ka shor-o-ghul hai bil-umum

raushni ban kar KHushi har samt hai chhai hui

ek KHilqat jis ke jalwon ki tamashai hui