diwali

ghuT gayā añdhere kā aaj dam akele meñ

har nazar Tahaltī hai raushnī ke mele meñ

aaj DhūñDhne par bhī mil sakī na tārīkī

maut kho ga.ī shāyad zindagī ke rele meñ

is tarah se hañstī haiñ aaj dīp-mālā.eñ

shoḳhiyāñ kareñ jaise saath mil ke bālā.eñ

har galī na.ī dulhan har saḌak hasīna hai

har dehāt añgūThī hai har nagar nagīna hai

paḌ ga.ī hai ḳhatre meñ aaj yam kī yamrājī

maut ke bhī māthe par maut kā pasīna hai

raat ke karūñ maiñ hai aaj raat kā kañgan

ik suhāganī ban kar chhā.ī jaatī hai jogan

qumqume jale ghar ghar raushnī hai paT paT par

le ke koī mañgal-ghaT chhā gayā hai ghaT ghaT par

raushnī karo lekin farz par na aañch aa.e

ho nigāh siimā par aur kaan aahaT par

hoshiyār un se bhī jo nigāh phere haiñ

paak hī nahīñ tanhā aur bhī luTere haiñ

chhoḌ apnī nāpākī yā badal de apnī dhun

maut legā yā jīvan do meñ jis ko chāhe chun

ham haiñ krishn kī liilā ham haiñ viir bhārat ke

ham nakul haiñ ham sahdev ham haiñ bhiim ham arjun

daropdī se durghaTnā duur kar ke chhoḌeñge

ai samay ke duryodhan chuur kar ke chhoḌeñge

qabr ho samādhī ho sab ko jagmagā.eñge

dhuum se shahīdoñ kā sog ham manāeñge

tum se kaam lenā hai ham ko dīp-mālāo

saare diip kī lau se dil kī lau baḌhā.eñge

sab se garmiyāñ le kar siine meñ chhupānā hai

dil ko is divālī se agnī bam banānā hai

ghuT gaya andhere ka aaj dam akele mein

har nazar Tahalti hai raushni ke mele mein

aaj DhunDhne par bhi mil saki na tariki

maut kho gai shayad zindagi ke rele mein

is tarah se hansti hain aaj dip-malaen

shoKHiyan karen jaise sath mil ke baalaen

har gali nai dulhan har saDak hasina hai

har dehat anguThi hai har nagar nagina hai

paD gai hai KHatre mein aaj yam ki yamraji

maut ke bhi mathe par maut ka pasina hai

raat ke karun main hai aaj raat ka kangan

ek suhagani ban kar chhai jati hai jogan

qumqume jale ghar ghar raushni hai paT paT par

le ke koi mangal-ghaT chha gaya hai ghaT ghaT par

raushni karo lekin farz par na aanch aae

ho nigah sima par aur kan aahaT par

hoshiyar un se bhi jo nigah phere hain

pak hi nahin tanha aur bhi luTere hain

chhoD apni napaki ya badal de apni dhun

maut lega ya jiwan do mein jis ko chahe chun

hum hain krishn ki lila hum hain wir bhaarat ke

hum nakul hain hum sahdew hum hain bhim hum arjun

daropdi se durghaTna dur kar ke chhoDenge

ai samay ke duryodhan chur kar ke chhoDenge

qabr ho samadhi ho sab ko jagmagaenge

dhum se shahidon ka sog hum manaenge

tum se kaam lena hai hum ko dip-malao

sare dip ki lau se dil ki lau baDhaenge

sab se garmiyan le kar sine mein chhupana hai

dil ko is diwali se agni bam banana hai