diwali

ho rahe haiñ raat ke diyoñ ke har sū ehtimām

sub.h se jalva-numā hai aaj dīvālī kī shaam

ho chukī ghar ghar sapedī dhul rahī haiñ nāliyāñ

phirtī haiñ kūchoñ meñ miTTī ke khilaune vāliyāñ

bholī-bhālī bachchiyāñ chanDol paapā kar magan

apnī guḌiyoñ ke gharoñdoñ meñ sajī hai anjuman

rasm kī in hikmatoñ ko kaun kah degā fuzūl

rakh diye haiñ Thīkroñ meñ ḳhāna-dārī ke usuul

jiit meñ har shaḳhs vo nau-ḳhez ho yā puḳhta-kār

haar se inkār lab-hā-e-masarrat par nisār

sard mausam kā laḌakpan garm chūlhoñ par shabāb

barf meñ saaqī lagā laayā hai mīnā-e-sharāb

abḳhare ban kar kaḌhā.ī par havā lahkī huī

har galī pakvān kī bū-bās se mahkī huī

ghī tuḌā kar paas vāloñ kī ḳhabar letā huā

char se shāloñ par Tapak jaane se bū detā huā

adh-jale īñdhan kā āñkhoñ meñ dhuāñ bhartā huā

nargis-e-shahlā meñ sīmāb-e-ḳhizāñ bhartā huā

nek-dil patnī kā hissa hai musībat jhelnā

pūriyāñ talne kā pas-manzar hai pāpaḌ belnā

halva-e-be-dūdh kī thāloñ kā bahr-e-be-karāñ

kashtiyāñ bahtī haiñ yā aa jā rahī haiñ mohriyāñ

sālimoñ ke saath haiñ TuuTe khilaune khānd ke

mor kā sar sher kā dhaḌ paañv ġhā.eb saanD ke

sahn meñ kheleñ batāshe abr se barse hue

bartanoñ ke paas pattal raat ke parse hue

kho ga.ī haiñ kaam ke andar kuñvārī laḌkiyāñ

saath vo ham-joliyāñ bhī aa.ī haiñ jo mehmāñ

ek nāzuk uñgliyoñ se devte dhotī huī

dūsrī dho.e huoñ ko chun ke ḳhush hotī huī

aur gaḌvā tīsrī aafat kī par-kālā liye

battiyāñ baTtī hai chauthī ruuī kā gaalā liye

pāñchveñ har sū diye tartīb se dhartī chalī

aur chhaTī battī sajā kar tel se bhartī chalī

ye jhamakkā kar chukā ārāsta jab taaq duur

sahn se ziine pe dauḌā aur pahuñchā baam par

oḌh kar kamlī savād-e-shām niklā sharq se

jūñhī rū-kārāoñ pe chhāyā thoḌe thoḌe farq se

shaam kā gesū khulī āñkhoñ pe jaadū kar gayā

bujh ga.ī sham-e-shafaq nazroñ meñ kohrā bhar gayā

tuur kā jalva charāġhoñ meñ simaT kar rah gayā

aañkh malnā thī ki nazzāra palaT kar rah gayā

raushnī meñ sāriyoñ ke rañg lahrāne lage

muḳhtalif āñchal havā ke ruḳh pe bal khāne lage

ye dīvālī ke manāzir ye nigāheñ kāmyāb

yā ilāhī tā qayāmat bar na aayad āftāb

ho rahe hain raat ke diyon ke har su ehtimam

subh se jalwa-numa hai aaj diwali ki sham

ho chuki ghar ghar sapedi dhul rahi hain naliyan

phirti hain kuchon mein miTTi ke khilaune waliyan

bholi-bhaali bachchiyan chanDol papa kar magan

apni guDiyon ke gharondon mein saji hai anjuman

rasm ki in hikmaton ko kaun kah dega fuzul

rakh diye hain Thikron mein KHana-dari ke usul

jit mein har shaKHs wo nau-KHez ho ya puKHta-kar

haar se inkar lab-ha-e-masarrat par nisar

sard mausam ka laDakpan garm chulhon par shabab

barf mein saqi laga laya hai mina-e-sharab

abKHare ban kar kaDhai par hawa lahki hui

har gali pakwan ki bu-bas se mahki hui

ghi tuDa kar pas walon ki KHabar leta hua

char se shaalon par Tapak jaane se bu deta hua

adh-jale indhan ka aankhon mein dhuan bharta hua

nargis-e-shahla mein simab-e-KHizan bharta hua

nek-dil patni ka hissa hai musibat jhelna

puriyan talne ka pas-manzar hai papaD belna

halwa-e-be-dudh ki thaalon ka bahr-e-be-karan

kashtiyan bahti hain ya aa ja rahi hain mohriyan

salimon ke sath hain TuTe khilaune khand ke

mor ka sar sher ka dhaD panw ghaeb sanD ke

sahn mein khelen batashe abr se barse hue

bartanon ke pas pattal raat ke parse hue

kho gai hain kaam ke andar kunwari laDkiyan

sath wo ham-joliyan bhi aai hain jo mehman

ek nazuk ungliyon se dewte dhoti hui

dusri dhoe huon ko chun ke KHush hoti hui

aur gaDwa tisri aafat ki par-kala liye

battiyan baTti hai chauthi rui ka gala liye

panchwen har su diye tartib se dharti chali

aur chhaTi batti saja kar tel se bharti chali

ye jhamakka kar chuka aarasta jab taq dur

sahn se zine pe dauDa aur pahuncha baam par

oDh kar kamli sawad-e-sham nikla sharq se

junhi ru-karaon pe chhaya thoDe thoDe farq se

sham ka gesu khuli aankhon pe jadu kar gaya

bujh gai sham-e-shafaq nazron mein kohra bhar gaya

tur ka jalwa charaghon mein simaT kar rah gaya

aankh malna thi ki nazzara palaT kar rah gaya

raushni mein sariyon ke rang lahrane lage

muKHtalif aanchal hawa ke ruKH pe bal khane lage

ye diwali ke manazir ye nigahen kaamyab

ya ilahi ta qayamat bar na aayad aaftab