do bund pani

kyā merī āñkhoñ meñ sannāTā hai

nahīñ barf-bārī ho rahī hai

log mujh se ḳhauf khāne lage haiñ jaise murde se

kyā mujh se kāfūr kī bū aatī hai

nahīñ to merī sāñsoñ meñ sāvan kā abas aur amaltās kī garmī hai

aur sāñso aur āñkhoñ ke darmiyān

fāsla ziyāda nahīñ

phir bhī bahut hai

is liye ki ḳhatm ho jaa.e to strugle hī ḳhatm ho jaa.e

zindagī ko jaarī to rakhnā hai intiqām

raat bahut paḌī hai alaav jaltā rahe to achchhā hai

jānvar dhueñ se ḳhauf khāte haiñ

aur insān raakh se

aag merā suhāg hai

āshiqoñ ke diloñ par haañ nahīñ hote ki maañg nikāl kar aag bhar dī jaa.e

is liye un ke dil phaT jaate haiñ

aag andar utar jaatī hai

uupar barf girtī rahtī hai

kapās ke phūloñ par moharram kā mausam hai yā-husainā vā-husainā

kapās dhunkī huī āsmāñ kī chhātī se barastī hai

ThanDī Thaar palkeñ bhī nahīñ jhapaktīñ

palkoñ kī jhālareñ safed ho jaatī haiñ barf ban kar un meñ aTī rahtī hai

aur andar barāmde ḳhālī ho jaate haiñ session mag jaatā hai

laḌkī nāḳhun kāTtī hai to chāñd us kī hathelī par utar aatā hai

tumhārā dūlhā bahut ḳhūb-sūrat hogā

donoñ hatheliyāñ joḌo to bhalā

chāñd to puurā ho gayā magar raushnī hāthoñ meñ band nahīñ ho sakī

phail ga.ī hatheliyoñ meñ chhed the

scientific sī baat hai

aag amiir suhāg sab laḌkiyoñ ke diloñ meñ nahīñ jaltī is liye ki sab

laḌkiyāñ āshiq nahīñ hotīñ

mahbūbā.eñ hotī haiñ

aur un kī āñkhoñ ke barāmde ḳhvān se saje rahte haiñ

barf-bārī un ke liye session hai mere liye mausam apne mashriq ma.anoñ ke saath

sūraj tulūa hotā hai

barf-bārī aur bulandiyoñ par chaḌh ga.ī

jānvar maidānoñ meñ nikal aa.e palkeñ ḳhāna-ba-dosh ho ga.iiñ

apnā sāvan uThā.e uThā.e

ghaaT ghaaT do band paanī islām-ābād meñ na rājasthān meñ

barf kī nahr nikālī jā.egī

aur mahbūbā.eñ aag ke bistar par leT kar mīThī barf ke gole chūseñgī

abhī un kī umr hī kyā hai

abhī to ye log small-chickens-of-snakes pāltī haiñ

māthe par kunDal Dāltī haiñ

chāhe jaane ke liye

lambī sunahrī kaar aur

do buuñd paanī

na barfistān meñ na ātish-dān meñ

laḌkī kī jins tabdīl ho rahī hai

laḌkī kā dūlhā do buuñd paanī kī ḳhātir havā ho gayā

laḌkī scare-crow ho ga.ī shāyad dūlhā ke bhā.iyoñ ke khetoñ meñ

achchhā hai dar-badarī hone se to bach rahī

bach rahī to use bachāne

us kā dūlhā zarūr aa.egā

kya meri aankhon mein sannaTa hai

nahin barf-bari ho rahi hai

log mujh se KHauf khane lage hain jaise murde se

kya mujh se kafur ki bu aati hai

nahin to meri sanson mein sawan ka abas aur amaltas ki garmi hai

aur sanso aur aankhon ke darmiyan

fasla ziyaada nahin

phir bhi bahut hai

is liye ki KHatm ho jae to strugle hi KHatm ho jae

zindagi ko jari to rakhna hai intiqam

raat bahut paDi hai alaw jalta rahe to achchha hai

jaanwar dhuen se KHauf khate hain

aur insan rakh se

aag mera suhag hai

aashiqon ke dilon par han nahin hote ki mang nikal kar aag bhar di jae

is liye un ke dil phaT jate hain

aag andar utar jati hai

upar barf girti rahti hai

kapas ke phulon par moharram ka mausam hai ya-husaina wa-husaina

kapas dhunki hui aasman ki chhati se barasti hai

ThanDi Thaar palken bhi nahin jhapaktin

palkon ki jhaalaren safed ho jati hain barf ban kar un mein aTi rahti hai

aur andar baramde KHali ho jate hain session mag jata hai

laDki naKHun kaTti hai to chand us ki hatheli par utar aata hai

tumhaara dulha bahut KHub-surat hoga

donon hatheliyan joDo to bhala

chand to pura ho gaya magar raushni hathon mein band nahin ho saki

phail gai hatheliyon mein chhed the

scientific si baat hai

aag amir suhag sab laDkiyon ke dilon mein nahin jalti is liye ki sab

laDkiyan aashiq nahin hotin

mahbubaen hoti hain

aur un ki aankhon ke baramde KHwan se saje rahte hain

barf-bari un ke liye session hai mere liye mausam apne mashriq manon ke sath

suraj tulua hota hai

barf-bari aur bulandiyon par chaDh gai

jaanwar maidanon mein nikal aae palken KHana-ba-dosh ho gain

apna sawan uThae uThae

ghaT ghaT do band pani islam-abaad mein na rajasthan mein

barf ki nahr nikali jaegi

aur mahbubaen aag ke bistar par leT kar miThi barf ke gole chusengi

abhi un ki umr hi kya hai

abhi to ye log small-chickens-of-snakes palti hain

mathe par kunDal Dalti hain

chahe jaane ke liye

lambi sunahri kar aur

do bund pani

na barfistan mein na aatish-dan mein

laDki ki jins tabdil ho rahi hai

laDki ka dulha do bund pani ki KHatir hawa ho gaya

laDki scare-crow ho gai shayad dulha ke bhaiyon ke kheton mein

achchha hai dar-badari hone se to bach rahi

bach rahi to use bachane

us ka dulha zarur aaega