do ishq

(1)

taaza haiñ abhī yaad meñ ai sāqī-e-gulfām

vo aks-e-ruḳh-e-yār se lahke hue ayyām

vo phuul sī khultī huī dīdār kī saa.at

vo dil sā dhaḌaktā huā ummīd kā hañgām

ummīd ki lau jaagā ġham-e-dil kā nasība

lo shauq kī tarsī huī shab ho ga.ī āḳhir

lo Duub ga.e dard ke be-ḳhvāb sitāre

ab chamkegā be-sabr nigāhoñ kā muqaddar

is baam se niklegā tire husn kā ḳhurshīd

is kunj se phūTegī kiran rang-e-hinā kī

is dar se bahegā tirī raftār kā sīmāb

us raah pe phailegī shafaq terī qabā kī

phir dekhe haiñ vo hijr ke tapte hue din bhī

jab fikr-e-dil-o-jāñ meñ fuġhāñ bhuul ga.ī hai

har shab vo siyah bojh ki dil baiTh gayā hai

har sub.h kī lau tiir sī siine meñ lagī hai

tanhā.ī meñ kyā kyā na tujhe yaad kiyā hai

kyā kyā na dil-e-zār ne DhūñDī haiñ panāheñ

āñkhoñ se lagāyā hai kabhī dast-e-sabā ko

Daalī haiñ kabhī gardan-e-mahtāb meñ bāheñ

(2)

chāhā hai isī rañg meñ lailā-e-vatan ko

taḌpā hai isī taur se dil us kī lagan meñ

DhūñDī hai yūñhī shauq ne āsā.ish-e-manzil

ruḳhsār ke ḳham meñ kabhī kākul kī shikan meñ

us jān-e-jahāñ ko bhī yūñhī qalb-o-nazar ne

hañs hañs ke sadā dī kabhī ro ro ke pukārā

puure kiye sab harf-e-tamannā ke taqāze

har dard ko ujyālā har ik ġham ko sañvārā

vāpas nahīñ pherā koī farmān junūñ kā

tanhā nahīñ lauTī kabhī āvāz jaras kī

ḳhairiyyat-e-jāñ rāhat-e-tan sehhat-e-dāmāñ

sab bhuul ga.iiñ maslihateñ ahl-e-havas kī

is raah meñ jo sab pe guzartī hai vo guzrī

tanhā pas-e-zindāñ kabhī rusvā sar-e-bāzār

garje haiñ bahut shaiḳh sar-e-gosha-e-mimbar

kaḌke haiñ bahut ahl-e-hakam bar-sar-e-darbār

chhoḌā nahīñ ġhairoñ ne koī nāvak-e-dushnām

chhūTī nahīñ apnoñ se koī tarz-e-malāmat

is ishq na us ishq pe nādim hai magar dil

har daaġh hai is dil meñ ba-juz-dāġh-e-nadāmat

(1)

taza hain abhi yaad mein ai saqi-e-gulfam

wo aks-e-ruKH-e-yar se lahke hue ayyam

wo phul si khulti hui didar ki saat

wo dil sa dhaDakta hua ummid ka hangam

ummid ki lau jaga gham-e-dil ka nasiba

lo shauq ki tarsi hui shab ho gai aaKHir

lo Dub gae dard ke be-KHwab sitare

ab chamkega be-sabr nigahon ka muqaddar

is baam se niklega tere husn ka KHurshid

is kunj se phuTegi kiran rang-e-hina ki

is dar se bahega teri raftar ka simab

us rah pe phailegi shafaq teri qaba ki

phir dekhe hain wo hijr ke tapte hue din bhi

jab fikr-e-dil-o-jaan mein fughan bhul gai hai

har shab wo siyah bojh ki dil baiTh gaya hai

har subh ki lau tir si sine mein lagi hai

tanhai mein kya kya na tujhe yaad kiya hai

kya kya na dil-e-zar ne DhunDi hain panahen

aankhon se lagaya hai kabhi dast-e-saba ko

Dali hain kabhi gardan-e-mahtab mein bahen

(2)

chaha hai isi rang mein laila-e-watan ko

taDpa hai isi taur se dil us ki lagan mein

DhunDi hai yunhi shauq ne aasaish-e-manzil

ruKHsar ke KHam mein kabhi kakul ki shikan mein

us jaan-e-jahan ko bhi yunhi qalb-o-nazar ne

hans hans ke sada di kabhi ro ro ke pukara

pure kiye sab harf-e-tamanna ke taqaze

har dard ko ujyala har ek gham ko sanwara

wapas nahin phera koi farman junun ka

tanha nahin lauTi kabhi aawaz jaras ki

KHairiyyat-e-jaan rahat-e-tan sehhat-e-daman

sab bhul gain maslihaten ahl-e-hawas ki

is rah mein jo sab pe guzarti hai wo guzri

tanha pas-e-zindan kabhi ruswa sar-e-bazar

garje hain bahut shaiKH sar-e-gosha-e-mimbar

kaDke hain bahut ahl-e-hakam bar-sar-e-darbar

chhoDa nahin ghairon ne koi nawak-e-dushnam

chhuTi nahin apnon se koi tarz-e-malamat

is ishq na us ishq pe nadim hai magar dil

har dagh hai is dil mein ba-juz-dagh-e-nadamat