do mashware

sumūm tez hai mauj-e-sabā ko aam karo

ḳhizāñ ke ruḳh ko palaTne kā ehtimām karo

bikhar rahe ho mazāmīn-e-shā.erī kī tarah

kisī maqām pe jam jaao koī kaam karo

sabaq milā hai ye tārīḳh ke navishtoñ se

ki teġh-e-haidar-e-karrār be-niyām karo

jabīñ pe ḳhaak hai kis āstān-e-daulat kī

kabhī to apnī aanā kā bhī ehtirām karo

ye mashvare haiñ ka.ī din se qasr-e-shāhī meñ

kisī tarīq se dānishvaroñ ko raam karo

qalam kī shoḳh-nigārī ko rokne ke liye

zabāñ-darāz adīboñ ko zer-e-dām karo

jhukā ke sar kisī farmāñ-ravā kī chaukhaT par

zabān-e-tohmat-o-ilzām be-lagām karo

'zafar' alī kī zabāñ meñ hai mashvara merā

mirī taraf se ise dostoñ meñ aam karo

is ibtilā se ḳhudā kī hazār-bār panāh

ki jhuk ke tum kisī nā-ahl ko salām karo

sumum tez hai mauj-e-saba ko aam karo

KHizan ke ruKH ko palaTne ka ehtimam karo

bikhar rahe ho mazamin-e-shaeri ki tarah

kisi maqam pe jam jao koi kaam karo

sabaq mila hai ye tariKH ke nawishton se

ki tegh-e-haidar-e-karrar be-niyam karo

jabin pe KHak hai kis aastan-e-daulat ki

kabhi to apni aana ka bhi ehtiram karo

ye mashware hain kai din se qasr-e-shahi mein

kisi tariq se danishwaron ko ram karo

qalam ki shoKH-nigari ko rokne ke liye

zaban-daraaz adibon ko zer-e-dam karo

jhuka ke sar kisi farman-rawa ki chaukhaT par

zaban-e-tohmat-o-ilzam be-lagam karo

'zafar' ali ki zaban mein hai mashwara mera

meri taraf se ise doston mein aam karo

is ibtila se KHuda ki hazar-bar panah

ki jhuk ke tum kisi na-ahl ko salam karo