do piyaade

sardiyoñ ke mausam meñ pichhlī raat ko chhat par

ham jo ek duuje se chāñdnī kī bārish meñ

be-zabān jazboñ kī ḳhushbuoñ se milte the

husn-e-dilrubā terā lafz kī haqīqat se kitnā be-ta.alluq thā

an-kahā sunā sab kuchh lamha-e-masarrat thā

jab se lab-kushā.ī ke silsile hue jaarī

terī merī bahsoñ ne

an-kahā sunā sab kuchh

mantiqoñ dalīloñ ke vāhimoñ se gadlāyā

aur phir mohabbat ke sab gulāb sañvlā.e

aaj ajnabiyyat kī be-samar fazāoñ meñ

ham ki ek duuje se kitne be-ta.alluq haiñ

avvalīñ rifāqat kī saarī ḳhaslateñ kho kar

is bisāt-e-hastī par

sirf do payāde haiñ

sardiyon ke mausam mein pichhli raat ko chhat par

hum jo ek duje se chandni ki barish mein

be-zaban jazbon ki KHushbuon se milte the

husn-e-dilruba tera lafz ki haqiqat se kitna be-talluq tha

an-kaha suna sab kuchh lamha-e-masarrat tha

jab se lab-kushai ke silsile hue jari

teri meri bahson ne

an-kaha suna sab kuchh

mantiqon dalilon ke wahimon se gadlaya

aur phir mohabbat ke sab gulab sanwlae

aaj ajnabiyyat ki be-samar fazaon mein

hum ki ek duje se kitne be-talluq hain

awwalin rifaqat ki sari KHaslaten kho kar

is bisat-e-hasti par

sirf do payaade hain