doctor ram babu saksena

ik adīb-e-nāmvar ik afsar-e-ā.alī-maqām

zaat saksena hai jis kī raam baabū jis kā naam

jis ne urdu par kiyā hai qābil-e-tārīf kaam

jis ko izzat kī nazar se dekhte haiñ ḳhās-o-ām

muḳhtalif mumtāz ohdoñ se huā jo sarfarāz

daur-e-ḳhidmat bhī guzārā jis ne bā-sad-ehtishām

us ne english meñ likhī urdu kī tārīḳh-e-adab

phir kiyā urdu meñ us ko chhāpne kā ehtimām

phir yahī tārīḳh hindī tarjuma ho kar chhapī

ġhair mulkoñ meñ bhī is tālīf kā hai ehtirām

zikr-e-ahl-e-harf hai jis meñ likhī vo bhī kitāb

us meñ samjhāyā 'anīs'-o-'mīr'-o-'ġhālib' kā maqām

shā.iroñ kā haal likkhā un kī tasvīroñ ke saath

aur añgrezoñ kā likkhā fārsī urdu kalām

haal urdu shā.irān-e-ahl-e-europe kā likhā

shā.irān-e-fārsī kā hai alag hindī kalām

chhap rahī hai masnavī-e-'mīr' bhī bā-ḳhatt-e-'mīr'

ab jadīd urdu adab kā ho rahā hai intizām

ab kahīñ urdu se vābasta ho koī ijtimā

har jagah us ko bulāte haiñ sabhī bā-ehtirām

us ne dī urdu adab ko zindagī-e-jāvedāñ

aur urdu se 'shifā' zinda rahegā us kā naam

ek adib-e-namwar ek afsar-e-aali-maqam

zat saksena hai jis ki ram babu jis ka nam

jis ne urdu par kiya hai qabil-e-tarif kaam

jis ko izzat ki nazar se dekhte hain KHas-o-am

muKHtalif mumtaz ohdon se hua jo sarfaraaz

daur-e-KHidmat bhi guzara jis ne ba-sad-ehtisham

us ne english mein likhi urdu ki tariKH-e-adab

phir kiya urdu mein us ko chhapne ka ehtimam

phir yahi tariKH hindi tarjuma ho kar chhapi

ghair mulkon mein bhi is talif ka hai ehtiram

zikr-e-ahl-e-harf hai jis mein likhi wo bhi kitab

us mein samjhaya 'anis'-o-'mir'-o-'ghaalib' ka maqam

shairon ka haal likkha un ki taswiron ke sath

aur angrezon ka likkha farsi urdu kalam

haal urdu shairan-e-ahl-e-europe ka likha

shairan-e-farsi ka hai alag hindi kalam

chhap rahi hai masnawi-e-'mir' bhi ba-KHatt-e-'mir'

ab jadid urdu adab ka ho raha hai intizam

ab kahin urdu se wabasta ho koi ijtima

har jagah us ko bulate hain sabhi ba-ehtiram

us ne di urdu adab ko zindagi-e-jawedan

aur urdu se 'shifa' zinda rahega us ka nam