doraha

jaag ai narm-nigāhī ke pur-asrār sukūt

aaj bīmār pe ye raat bahut bhārī hai

jo ḳhud apne hī salāsil meñ giraftār rahe

un ḳhudāoñ se mire ġham kī davā kyā hogī

sochte sochte thak jā.eñge niile sāgar

jāgte jāgte so jā.egā maddham ākāsh

is chhalaktī huī shabnam kā zarā sā qatra

kisī ma.asūm se ruḳhsār pe jam jā.egā

ek taarā nazar aa.egā kisī chilman meñ

ek aañsū kisī bistar pe bikhar jā.egā

haañ magar terā ye bīmār kidhar jā.egā

maiñ ne ik nazm meñ likkhā thā ki ai rūh-e-vafā

chārasāzī tire nāḳhun kī rahīn-e-minnat

ġham-gusārī tirī palkoñ kī rivāyāt meñ hai

ek chhoTī hī sī ummīd-e-tarab-zār sahī

ek jugnū kā ujālā mirī barsāt meñ hai

lazzat-e-āriz-o-lab sā.at-e-takmīl-e-visāl

merī taqdīr meñ hai aur tirī baat meñ hai

dair se, ka.abe se, idrāk se bhī uktā kar

aaj tak dil ko ujāle kī talab hotī hai

ek din aa.egā jab aur bhī uryāñ ho kar

aadmī jiine ko thoḌī sī ziyā māñgegā

giit ke, phuul ke, ash.ār ke, afsānoñ ke

aaj tak ham ne banā.e haiñ khilaune kitne

ye khilaune bhī na hote to hamārā bachpan

sochtā huuñ ki guzartā to guzartā kaise

aadmī ziist ke sailāb se laḌte laḌte

biich mañjdhār meñ aatā to ubhartā kaise

der se ruuh pe ik ḳhvāb-e-girāñ taarī hai

aaj bīmār pe ye raat bahut bhārī hai

aaj phir dosh-e-tamannā pe hai dil kā tābūt

jaag ai narm-nigāhī ke masīhāna sukūt

varna insān kī fitrat kā talavvun mat pūchh

is sin-o-sāl kā maġhrūr laḌakpan mat pūchh

aadmī terī is uftād se bad-dil ho kar

aur do-chār ḳhudāoñ ke alam pūjegā

aur ik roz is andāz se bhī uktā kar

apne be-nām ḳhayāloñ ke sanam pūjegā

jag ai narm-nigahi ke pur-asrar sukut

aaj bimar pe ye raat bahut bhaari hai

jo KHud apne hi salasil mein giraftar rahe

un KHudaon se mere gham ki dawa kya hogi

sochte sochte thak jaenge nile sagar

jagte jagte so jaega maddham aakash

is chhalakti hui shabnam ka zara sa qatra

kisi masum se ruKHsar pe jam jaega

ek tara nazar aaega kisi chilman mein

ek aansu kisi bistar pe bikhar jaega

han magar tera ye bimar kidhar jaega

main ne ek nazm mein likkha tha ki ai ruh-e-wafa

chaarasazi tere naKHun ki rahin-e-minnat

gham-gusari teri palkon ki riwayat mein hai

ek chhoTi hi si ummid-e-tarab-zar sahi

ek jugnu ka ujala meri barsat mein hai

lazzat-e-ariz-o-lab saat-e-takmil-e-visal

meri taqdir mein hai aur teri baat mein hai

dair se, kabe se, idrak se bhi ukta kar

aaj tak dil ko ujale ki talab hoti hai

ek din aaega jab aur bhi uryan ho kar

aadmi jine ko thoDi si ziya mangega

git ke, phul ke, ashaar ke, afsanon ke

aaj tak hum ne banae hain khilaune kitne

ye khilaune bhi na hote to hamara bachpan

sochta hun ki guzarta to guzarta kaise

aadmi zist ke sailab se laDte laDte

bich manjdhaar mein aata to ubharta kaise

der se ruh pe ek KHwab-e-giran tari hai

aaj bimar pe ye raat bahut bhaari hai

aaj phir dosh-e-tamanna pe hai dil ka tabut

jag ai narm-nigahi ke masihana sukut

warna insan ki fitrat ka talawwun mat puchh

is sin-o-sal ka maghrur laDakpan mat puchh

aadmi teri is uftad se bad-dil ho kar

aur do-chaar KHudaon ke alam pujega

aur ek roz is andaz se bhi ukta kar

apne be-nam KHayalon ke sanam pujega