doraha

rail-gāḌī ye ghamsān ilāhī tauba

na muravvat na takalluf na tabassum na adā

yūñhī ik ġhair-shu.ūrī sī ḳhushūnat kā ḳharosh

be-irāda hai to kyā ġhair-shu.ūrī hai to kyā

ye na.e daur ke ehsās-e-ġhulāmī kā zuhūr

intiqāma tahakkum kī numūd

is meñ ik iz.hār-e-baġhāvat bhī to hai

yūñhī yūñhī sahī

ik shā.iba-e-dād-e-shujā.at bhī to hai

chaak to kartā huuñ maiñ apnā garebāñ hī sahī

kulbulātī huī maḳhlūq kī is daldal meñ

siina taane hue kuchh log baḌhe jaate haiñ

ḳhuub phunkārte phan phailā.e

log vo log nahīñ

jin ko Thukrāte hue jaate haiñ

ye log baḌe sāhab log

ye jo hukkām hamāre haiñ ye hukkām nahīñ

jo hameñ se haiñ magar ham meñ nahīñ

ye jo bandoñ ke haiñ aaqā magar aaqā ke ġhulām

bā-vafā huuñ to huuñ be-dām nahīñ

tū dost kisī kā bhī sitamgar na huā thā

un pe duniyā kī har ik raah kushāda hai magar

aaj ik sañg-e-garāñ haa.il hai

ki uThā.e na uThe aur hilā.e na hile

dūsre darje ke darvāze meñ

un ke āqāoñ kā ik fard farañgī gorā

bāheñ phailā.e hue rāsta roke hai khaḌā

kaun hotā hai harīf-e-mai-e-mard afgan-e-ishq

sīTiyāñ bajne lagīñ ḳhidmat-e-sarkār bajā laanā hai

aur sarkār hī ḳhud sañg-e-rah-e-manzil hai

zindagī aa ga.ī dorāhe par

der kyuuñ karte ho bhāgo bhāgo

dauḌ kar third ke Darbe meñ ghuso

apne ham-jins ġhulāmoñ meñ milo

zindagī aa ga.ī dorāhe par

rail-gaDi ye ghamsan ilahi tauba

na murawwat na takalluf na tabassum na ada

yunhi ek ghair-shuuri si KHushunat ka KHarosh

be-irada hai to kya ghair-shuuri hai to kya

ye nae daur ke ehsas-e-ghulami ka zuhur

intiqama tahakkum ki numud

is mein ek izhaar-e-baghawat bhi to hai

yunhi yunhi sahi

ek shaiba-e-dad-e-shujaat bhi to hai

chaak to karta hun main apna gareban hi sahi

kulbulati hui maKHluq ki is daldal mein

sina tane hue kuchh log baDhe jate hain

KHub phunkarte phan phailae

log wo log nahin

jin ko Thukraate hue jate hain

ye log baDe sahab log

ye jo hukkaam hamare hain ye hukkaam nahin

jo hamein se hain magar hum mein nahin

ye jo bandon ke hain aaqa magar aaqa ke ghulam

ba-wafa hun to hun be-dam nahin

tu dost kisi ka bhi sitamgar na hua tha

un pe duniya ki har ek rah kushada hai magar

aaj ek sang-e-garan hail hai

ki uThae na uThe aur hilae na hile

dusre darje ke darwaze mein

un ke aaqaon ka ek fard farangi gora

bahen phailae hue rasta roke hai khaDa

kaun hota hai harif-e-mai-e-mard afgan-e-ishq

siTiyan bajne lagin KHidmat-e-sarkar baja lana hai

aur sarkar hi KHud sang-e-rah-e-manzil hai

zindagi aa gai dorahe par

der kyun karte ho bhago bhago

dauD kar third ke Darbe mein ghuso

apne ham-jins ghulamon mein milo

zindagi aa gai dorahe par