dost

maiñ bahut akelā huuñ

tum mujh se dostī kar lo

shahr kahtā hai

aur apne haath

hamārī taraf phailā detā hai

ham us ke hāthoñ ko dekhte haiñ

aur Dar jaate haiñ

shahr ke haath kuhniyoñ tak

jale hue haiñ

aisī hālat meñ

koī kisī ke haath

bhalā kaise thaam saktā hai

koī kisī ke saath

kaise dostī kar saktā hai

ham apnā muñh pher lete haiñ

aur shahr se duur

jaane lagte haiñ

hameñ apne paas se jaatā dekh kar

shahr ko shāyad bahut Dar lagtā hai

vo jaldī jaldī hamāre pīchhe aane lagtā hai

aur kahtā hai mujhe bhī

apne saath le chalo

apne hāthoñ ko ek safed kapḌe se chhupāte hue

vo apnī baat dohrātā hai

use apne saath aatā dekh kar

ham ruk jaate haiñ

shahr bhī ruk jaatā hai

ham us ke pairoñ ko dekhte haiñ

aur apnī āñkheñ

band kar lete haiñ

us ke pairoñ kī uñgliyoñ meñ

bahut se chhāpe paḌe hue haiñ

us kī eḌī aur talvoñ se

ḳhuun bah rahā hai

ham shahr se kahte haiñ

canvas ke juute

aur uunī moze pahne baġhair

tum hamāre saath nahīñ chal sakte

apne rāste par

chalne lagte haiñ

hamārī bātoñ se shahr kī āñkhoñ meñ

kitne aañsū jam.a ho jaate haiñ

ham unheñ nahīñ dekhte

hamāre jaane se shahr ke dil par

kyā asar hogā

hameñ us kī koī fikr nahīñ

hamāre baġhair shahr

kis qadar udaas kitnā akelā ho jaatā hai

us ke baġhair apne rāste par chalte hue

hameñ us kā andāza hī nahīñ hotā

ham nahīñ jānte

jab bhī hameñ kuchh hotā hai

hamāre dostoñ kī tarah shahr

hamāre liye pareshān ho jaatā hai

hameñ bachāne ke liye

ham jahāñ bhī kahīñ hoñ

vo apne zaḳhmī pairoñ ke saath

hamārī samt meñ

dauḌne lagtā hai

hameñ na pā kar

apne

kuhniyoñ tak jale

haath uThā kar

shahr hamārī ḳhairiyat kī

duā.eñ māñgne lagtā hai

main bahut akela hun

tum mujh se dosti kar lo

shahr kahta hai

aur apne hath

hamari taraf phaila deta hai

hum us ke hathon ko dekhte hain

aur Dar jate hain

shahr ke hath kuhniyon tak

jale hue hain

aisi haalat mein

koi kisi ke hath

bhala kaise tham sakta hai

koi kisi ke sath

kaise dosti kar sakta hai

hum apna munh pher lete hain

aur shahr se dur

jaane lagte hain

hamein apne pas se jata dekh kar

shahr ko shayad bahut Dar lagta hai

wo jaldi jaldi hamare pichhe aane lagta hai

aur kahta hai mujhe bhi

apne sath le chalo

apne hathon ko ek safed kapDe se chhupate hue

wo apni baat dohraata hai

use apne sath aata dekh kar

hum ruk jate hain

shahr bhi ruk jata hai

hum us ke pairon ko dekhte hain

aur apni aankhen

band kar lete hain

us ke pairon ki ungliyon mein

bahut se chhape paDe hue hain

us ki eDi aur talwon se

KHun bah raha hai

hum shahr se kahte hain

canwas ke jute

aur uni moze pahne baghair

tum hamare sath nahin chal sakte

apne raste par

chalne lagte hain

hamari baaton se shahr ki aankhon mein

kitne aansu jama ho jate hain

hum unhen nahin dekhte

hamare jaane se shahr ke dil par

kya asar hoga

hamein us ki koi fikr nahin

hamare baghair shahr

kis qadar udas kitna akela ho jata hai

us ke baghair apne raste par chalte hue

hamein us ka andaza hi nahin hota

hum nahin jaante

jab bhi hamein kuchh hota hai

hamare doston ki tarah shahr

hamare liye pareshan ho jata hai

hamein bachane ke liye

hum jahan bhi kahin hon

wo apne zaKHmi pairon ke sath

hamari samt mein

dauDne lagta hai

hamein na pa kar

apne

kuhniyon tak jale

hath uTha kar

shahr hamari KHairiyat ki

duaen mangne lagta hai