dosti ka hath

guzar ga.e ka.ī mausam ka.ī ruteñ badlīñ

udaas tum bhī ho yaaro udaas ham bhī haiñ

faqat tumhīñ ko nahīñ rañj-e-chāk-dāmānī

ki sach kaheñ to darīda-libās ham bhī haiñ

tumhāre baam kī sham.eñ bhī tābnāk nahīñ

mire falak ke sitāre bhī zard zard se haiñ

tumhāre ā.ina-ḳhāne bhī zañg-ālūda

mire surāhī o sāġhar bhī gard gard se haiñ

na tum ko apne ḳhad-o-ḳhāl hī nazar aa.eñ

na maiñ ye dekh sakūñ jaam meñ bharā kyā hai

basāratoñ pe vo jaale paḌe ki donoñ ko

samajh meñ kuchh nahīñ aatā ki mājrā kyā hai

na sarv meñ vo ġhurūr-e-kashīda-qāmatī hai

na qumriyoñ kī udāsī meñ kuchh kamī aa.ī

na khil sake kisī jānib mohabbatoñ ke gulāb

na shāḳh-e-amn liye fāḳhta koī aa.ī

tumheñ bhī zid hai ki mashq-e-sitam rahe jaarī

hameñ bhī naaz ki jaur-o-jafā ke aadī haiñ

tumheñ bhī zo.am mahā-bhārtā laḌī tum ne

hameñ bhī faḳhr ki ham karbalā ke aadī haiñ

sitam to ye hai ki donoñ ke marġh-zāroñ se

havā-e-fitna o bū-e-fasād aatī hai

alam to ye hai ki donoñ ko vahm hai ki bahār

adū ke ḳhuuñ meñ nahāne ke ba.ad aatī hai

to ab ye haal huā is darindagī ke sabab

tumhāre paañv salāmat rahe na haath mire

na jiit jiit tumhārī na haar haar mirī

na koī saath tumhāre na koī saath mire

hamāre shahroñ kī majbūr o be-navā maḳhlūq

dabī huī hai dukhoñ ke hazār Dheroñ meñ

ab un kī tīra-nasībī charāġh chāhtī hai

jo log nisf sadī tak rahe añdheroñ meñ

charāġh jin se mohabbat kī raushnī phaile

charāġh jin se diloñ ke dayār raushan hoñ

charāġh jin se ziyā amn-o-āshtī kī mile

charāġh jin se diye be-shumār raushan huuñ

tumhāre des meñ aayā huuñ dosto ab ke

na sāz-o-naġhma kī mahfil na shā.irī ke liye

agar tumhārī anā hī kā hai savāl to phir

chalo maiñ haath baḌhātā huuñ dostī ke liye

guzar gae kai mausam kai ruten badlin

udas tum bhi ho yaro udas hum bhi hain

faqat tumhin ko nahin ranj-e-chaak-damani

ki sach kahen to darida-libas hum bhi hain

tumhaare baam ki shamen bhi tabnak nahin

mere falak ke sitare bhi zard zard se hain

tumhaare aaina-KHane bhi zang-aluda

mere surahi o saghar bhi gard gard se hain

na tum ko apne KHad-o-KHal hi nazar aaen

na main ye dekh sakun jam mein bhara kya hai

basaraton pe wo jale paDe ki donon ko

samajh mein kuchh nahin aata ki majra kya hai

na sarw mein wo ghurur-e-kashida-qamati hai

na qumriyon ki udasi mein kuchh kami aai

na khil sake kisi jaanib mohabbaton ke gulab

na shaKH-e-amn liye faKHta koi aai

tumhein bhi zid hai ki mashq-e-sitam rahe jari

hamein bhi naz ki jaur-o-jafa ke aadi hain

tumhein bhi zoam maha-bhaarta laDi tum ne

hamein bhi faKHr ki hum karbala ke aadi hain

sitam to ye hai ki donon ke margh-zaron se

hawa-e-fitna o bu-e-fasad aati hai

alam to ye hai ki donon ko wahm hai ki bahaar

adu ke KHun mein nahane ke baad aati hai

to ab ye haal hua is darindagi ke sabab

tumhaare panw salamat rahe na hath mere

na jit jit tumhaari na haar haar meri

na koi sath tumhaare na koi sath mere

hamare shahron ki majbur o be-nawa maKHluq

dabi hui hai dukhon ke hazar Dheron mein

ab un ki tira-nasibi charagh chahti hai

jo log nisf sadi tak rahe andheron mein

charagh jin se mohabbat ki raushni phaile

charagh jin se dilon ke dayar raushan hon

charagh jin se ziya amn-o-ashti ki mile

charagh jin se diye be-shumar raushan hun

tumhaare des mein aaya hun dosto ab ke

na saz-o-naghma ki mahfil na shairi ke liye

agar tumhaari ana hi ka hai sawal to phir

chalo main hath baDhata hun dosti ke liye