dua

raat jī khol ke phir maiñ ne du'ā māñgī hai

aur ik chiiz baḌī besh-bahā māñgī hai

aur vo chiiz na daulat na makāñ hai na mahal

taaj māñgā hai na dastār-o-qabā māñgī hai

na to qadmoñ ke tale farsh-e-guhar māñgā hai

aur na sar par kulah-e-bāl-e-humā māñgī hai

na sharīk-e-safar-o-zād-e-safar māñgā hai

na sadā-e-jaras-o-bāñg-e-darā māñgī hai

na sikandar kī tarah fat.h kā parcham māñgā

aur na mānind-e-ḳhizar ‘umr-e-baqā māñgī hai

na koī 'ohda na kursī na laqab māñgā hai

na kisī ḳhidmat-e-qaumī kī jazā māñgī hai

na to mehmān-e-ḳhusūsī kā sharaf māñgā hai

aur na mahfil meñ kahīñ sadr kī jā māñgī hai

mai-kada māñgā na saaqī na gulistāñ na bahār

jām-o-sāġhar na mai-e-hosh-rubā māñgī hai

na to manzar koī shādāb-o-hasīñ māñgā hai

na sehat-baḳhsh koī āb-o-havā māñgī hai

mahfil-e-‘aish na sāmān-e-tarab māñgā hai

chāñdnī raat na ghanghor ghaTā māñgī hai

bāñsurī māñgī na tā.ūs na barbat na rabāb

na koī mutriba-e-shīrīñ-navā māñgī hai

chain kī niiñd na ārām kā pahlū māñgā

baḳht-e-be-dār na taqdīr-e-rasā māñgī hai

na to ashkoñ kī farāvānī se māñgī hai najāt

aur na apne maraz-e-dil kī shifā māñgī hai

na ġhazal ke liye āhang nayā māñgā hai

na tarannum kī na.ī tarz-e-adā māñgī hai

sun ke hairān hue jaate haiñ arbāb-e-chaman

āḳhirash kaun sī pāgal ne du'ā māñgī hai

aa tire kaan meñ kah duuñ ai nasīm-e-saharī

sab se pyārī mujhe kyā chiiz hai kyā māñgī hai

vo sarāpā-e-sitam jis kā maiñ dīvāna huuñ

us kī zulfoñ ke liye bū-e-vafā māñgī hai

raat ji khol ke phir main ne du'a mangi hai

aur ek chiz baDi besh-baha mangi hai

aur wo chiz na daulat na makan hai na mahal

taj manga hai na dastar-o-qaba mangi hai

na to qadmon ke tale farsh-e-guhar manga hai

aur na sar par kulah-e-baal-e-huma mangi hai

na sharik-e-safar-o-zad-e-safar manga hai

na sada-e-jaras-o-bang-e-dara mangi hai

na sikandar ki tarah fath ka parcham manga

aur na manind-e-KHizar ‘umr-e-baqa mangi hai

na koi 'ohda na kursi na laqab manga hai

na kisi KHidmat-e-qaumi ki jaza mangi hai

na to mehman-e-KHususi ka sharaf manga hai

aur na mahfil mein kahin sadr ki ja mangi hai

mai-kada manga na saqi na gulistan na bahaar

jam-o-saghar na mai-e-hosh-ruba mangi hai

na to manzar koi shadab-o-hasin manga hai

na sehat-baKHsh koi aab-o-hawa mangi hai

mahfil-e-‘aish na saman-e-tarab manga hai

chandni raat na ghanghor ghaTa mangi hai

bansuri mangi na taus na barbat na rabab

na koi mutriba-e-shirin-nawa mangi hai

chain ki nind na aaram ka pahlu manga

baKHt-e-be-dar na taqdir-e-rasa mangi hai

na to ashkon ki farawani se mangi hai najat

aur na apne maraz-e-dil ki shifa mangi hai

na ghazal ke liye aahang naya manga hai

na tarannum ki nai tarz-e-ada mangi hai

sun ke hairan hue jate hain arbab-e-chaman

aaKHirash kaun si pagal ne du'a mangi hai

aa tere kan mein kah dun ai nasim-e-sahari

sab se pyari mujhe kya chiz hai kya mangi hai

wo sarapa-e-sitam jis ka main diwana hun

us ki zulfon ke liye bu-e-wafa mangi hai