dua

ai sansār banāne vaale

sūraj ko chamkāne vaale

ḳhaak se phuul ugāne vaale

dariyāoñ ko bahāne vaale

mere ḳhāliq mere aaqā

hañstā hañstā chāñd nikālā

ThanDī ThanDī kirnoñ vaalā

kartā hai rātoñ ko ujālā

tū ne baḳhshā is ko ujālā

mere ḳhāliq mere aaqā

maañ kī mohabbat baap kā saaya

maiñ ne tere karam se paayā

bhaa.ī bahan kā pyaar dikhāyā

kaisā achchhā rishta banāyā

mere ḳhāliq mere aaqā

achchhā laḌkā mujh ko banānā

sīdhe raste mujh ko chalānā

jis ne kahā hai terā maanā

sab ne us ko achchhā jaanā

mere ḳhāliq mere aaqā

tujh ko pūjūñ tujh ko jānūñ

hukm tirā ḳhush ho kar mānūñ

aql vo de tujh ko pahchānūñ

gumrāhī kī ḳhaak na chhānūñ

mere ḳhāliq mere aaqā

ai sansar banane wale

suraj ko chamkane wale

KHak se phul ugane wale

dariyaon ko bahane wale

mere KHaliq mere aaqa

hansta hansta chand nikala

ThanDi ThanDi kirnon wala

karta hai raaton ko ujala

tu ne baKHsha is ko ujala

mere KHaliq mere aaqa

man ki mohabbat bap ka saya

main ne tere karam se paya

bhai bahan ka pyar dikhaya

kaisa achchha rishta banaya

mere KHaliq mere aaqa

achchha laDka mujh ko banana

sidhe raste mujh ko chalana

jis ne kaha hai tera mana

sab ne us ko achchha jaana

mere KHaliq mere aaqa

tujh ko pujun tujh ko jaanun

hukm tera KHush ho kar manun

aql wo de tujh ko pahchanun

gumrahi ki KHak na chhanun

mere KHaliq mere aaqa