dua

an-ginat shamsī-nizāmoñ ke bakheḌoñ se agar

ik zarā fursat mile to

merī āñkhoñ kī namīda kor par ashk-e-nadāmat kī taraf bhī dekh lenā

jhilmilātā ik sitāra jaise istiġhfār kā koī vazīfa

ye zamīñ

terī maḳhlūqāt kā adnā sā zarra

aur is zarre kā maiñ juzv-e-haqīr

merā hissa nabz-e-ma.ānī kī ḳhush-āhañgī meñ lafzoñ ko nachānā

apne hī ham-shakl jarsūmoñ kī phailā.ī huī bīmāriyoñ ke

x-ray photo mire alfāz

ġhair duniyā ġhair is kā tajraba

lafz ġhair āhañg ġhair

phir bhī mere kaan meñ phūñkā kisī ne

jo bhī kuchh maiñ kar rahā huuñ

jo bhī kuchh maiñ likh rahā huuñ

vo merī taḳhlīq hai

maiñ bhī apne aap meñ taḳhlīq-kār

aur ye shaitān phūñk

mere sar meñ chaḌh ga.ī

maiñ ne apnī ruuh ko

pāniyoñ par chhe dinoñ tak be-takāñ jumbish meñ paayā

lafz-e-kun kā vird kar ke aañkh jab kholī to dekhā

ye zamīñ ye āsmāñ

raushnī paanī fazā ḳhushkī daraḳht

chāñd sūraj kahkashāñ haivān jin insāñ malak

ek coras ban ga.e haiñ

aur mujh par hañs rahe haiñ

mere aage pīchhe sharr-e-mā-ḳhalaq hai

ai tulū-e-sub.h ke rab

ik zarā fursat mile to

merī is gum-sum anā ko

apne sūraj kī zarā sī raushnī aur aañch de denā

aur kah denā mirī maḳhlūq jā merī nishānī ban

mujh se apnī ruuh ke

yā ruuh se mere guzarne kī kahānī ban

an-ginat shamsi-nizamon ke bakheDon se agar

ek zara fursat mile to

meri aankhon ki namida kor par ashk-e-nadamat ki taraf bhi dekh lena

jhilmilata ek sitara jaise istighfar ka koi wazifa

ye zamin

teri maKHluqat ka adna sa zarra

aur is zarre ka main juzw-e-haqir

mera hissa nabz-e-maani ki KHush-ahangi mein lafzon ko nachana

apne hi ham-shakl jarsumon ki phailai hui bimariyon ke

x-ray photo mere alfaz

ghair duniya ghair is ka tajraba

lafz ghair aahang ghair

phir bhi mere kan mein phunka kisi ne

jo bhi kuchh main kar raha hun

jo bhi kuchh main likh raha hun

wo meri taKHliq hai

main bhi apne aap mein taKHliq-kar

aur ye shaitan phunk

mere sar mein chaDh gai

main ne apni ruh ko

paniyon par chhe dinon tak be-takan jumbish mein paya

lafz-e-kun ka wird kar ke aankh jab kholi to dekha

ye zamin ye aasman

raushni pani faza KHushki daraKHt

chand suraj kahkashan haiwan jin insan malak

ek coras ban gae hain

aur mujh par hans rahe hain

mere aage pichhe sharr-e-ma-KHalaq hai

ai tulu-e-subh ke rab

ek zara fursat mile to

meri is gum-sum ana ko

apne suraj ki zara si raushni aur aanch de dena

aur kah dena meri maKHluq ja meri nishani ban

mujh se apni ruh ke

ya ruh se mere guzarne ki kahani ban