dua

byāz-e-shab-o-roz par dastaḳhat tere qadmoñ ke hoñ

badan ke pasīne se qarnoñ ke aurāq mahkeñ

sabā tere raste se kañkar haTā.e

falak par garajtā huā garm bādal

tire tan kī qaus-e-quzah kā

laraztā damaktā huā koī manzar dikhā.e

tujhe har qadam par mileñ manzileñ

havā ke ek bārīk se tez chābuk kī sūrat

tirī band muTThī meñ dubkī rahe

sadā tujh ko hairat se dekhe zamāna

to bahte hue tez dhāroñ kī manzil bane

bādbāñ saare terī hī jānib khuleñ

aur ufuq kī muñDeroñ pe koḌoñ ko lambī qatāreñ

tirī muntazir huuñ

agar maiñ zamīñ ke siyah tañg pātāl meñ gir bhī jā.ūñ to kyā hai

tujhe to zamīñ kore kāġhaz kī sūrat mile

byāz-e-shab-o-roz par dastaḳhat tere qadmoñ ke hoñ

chahakte hue tīnoñ naT-khaT zamāne

tire gurū nācheñ

to bansī kī tānoñ se har shai ko pāgal kare nazr-e-ātish kare

toḌ Daale

magar ḳhud na TuuTe

kabhī to na TuuTe

byaz-e-shab-o-roz par dastaKHat tere qadmon ke hon

badan ke pasine se qarnon ke auraq mahken

saba tere raste se kankar haTae

falak par garajta hua garm baadal

tere tan ki qaus-e-quzah ka

larazta damakta hua koi manzar dikhae

tujhe har qadam par milen manzilen

hawa ke ek barik se tez chabuk ki surat

teri band muTThi mein dubki rahe

sada tujh ko hairat se dekhe zamana

to bahte hue tez dhaaron ki manzil bane

baadban sare teri hi jaanib khulen

aur ufuq ki munDeron pe koDon ko lambi qataren

teri muntazir hun

agar main zamin ke siyah tang patal mein gir bhi jaun to kya hai

tujhe to zamin kore kaghaz ki surat mile

byaz-e-shab-o-roz par dastaKHat tere qadmon ke hon

chahakte hue tinon naT-khaT zamane

tere guru nachen

to bansi ki tanon se har shai ko pagal kare nazr-e-atish kare

toD Dale

magar KHud na TuTe

kabhi to na TuTe