dua

duā

ai raaja parjā ke mālik

ai saarī duniyā ke mālik

ai donoñ aalam ke daatā

terā nahīñ kisī se naatā

koī nahīñ hai terā ham-sar

tū hai sab se baalā bartar

ham haiñ tere dar ke bhikārī

sharm hai tere haath hamārī

jis ko chāhe izzat de de

jis ko chāhe zillat de de

izzat zillat kā tū mālik

dozaḳh jannat kā tū mālik

mālik tū donoñ aalam kā

ḳhāliq tū jinn-o-ādam kā

chāhte haiñ ham tujh se izzat

de de maulā de de izzat

izzat de ham ko duniyā meñ

rāhat de ham ko uqbā meñ

ilm-o-amal meñ hissa de kar

kar de ham ko sab se behtar

yaad se apnī shaad hameñ kar

duniyā meñ ābād hameñ kar

aql bhī de aur ilm atā kar

fahm bhī de aur hilm atā kar

jis se tū ho raazī maulā

baat vahī hai achchhī maulā

taa.at kā apnī chaskā de

apnī ulfat kā saudā de

ishq kī bū maujūd ho dil meñ

tū hī tū maujūd ho dil meñ

ban jaa.e har kaam hamārā

haq par ho anjām hamārā

dua

ai raja parja ke malik

ai sari duniya ke malik

ai donon aalam ke data

tera nahin kisi se nata

koi nahin hai tera ham-sar

tu hai sab se baala bartar

hum hain tere dar ke bhikari

sharm hai tere hath hamari

jis ko chahe izzat de de

jis ko chahe zillat de de

izzat zillat ka tu malik

dozaKH jannat ka tu malik

malik tu donon aalam ka

KHaliq tu jinn-o-adam ka

chahte hain hum tujh se izzat

de de maula de de izzat

izzat de hum ko duniya mein

rahat de hum ko uqba mein

ilm-o-amal mein hissa de kar

kar de hum ko sab se behtar

yaad se apni shad hamein kar

duniya mein aabaad hamein kar

aql bhi de aur ilm ata kar

fahm bhi de aur hilm ata kar

jis se tu ho raazi maula

baat wahi hai achchhi maula

taat ka apni chaska de

apni ulfat ka sauda de

ishq ki bu maujud ho dil mein

tu hi tu maujud ho dil mein

ban jae har kaam hamara

haq par ho anjam hamara