ye mahlon ye taKHton ye tajon ki duniya

ye mahloñ ye taḳhtoñ ye tājoñ kī duniyā

ye insāñ ke dushman samājoñ kī duniyā

ye daulat ke bhūke rivājoñ kī duniyā

ye duniyā agar mil bhī jaa.e to kyā hai

har ik jism ghāyal har ik ruuh pyāsī

nigāhoñ meñ uljhan diloñ meñ udāsī

ye duniyā hai yā ālam-e-bad-havāsī

ye duniyā agar mil bhī jaa.e to kyā hai

yahāñ ik khilaunā hai insāñ kī hastī

ye bastī hai murda-parastoñ kī bastī

yahāñ par to jīvan se hai maut sastī

ye duniyā agar mil bhī jaa.e to kyā hai

javānī bhaTaktī hai bad-kār ban kar

javāñ jism sajte haiñ bāzār ban kar

yahāñ pyaar hotā hai bevpār ban kar

ye duniyā agar mil bhī jaa.e to kyā hai

ye duniyā jahāñ aadmī kuchh nahīñ hai

vafā kuchh nahīñ dostī kuchh nahīñ hai

jahāñ pyaar kī qadr hī kuchh nahīñ hai

ye duniyā agar mil bhī jaa.e to kyā hai

jalā do ise phūñk Daalo ye duniyā

mire sāmne se haTā lo ye duniyā

tumhārī hai tum hī sambhālo ye duniyā

ye duniyā agar mil bhī jaa.e to kyā hai

ye mahlon ye taKHton ye tajon ki duniya

ye insan ke dushman samajon ki duniya

ye daulat ke bhuke riwajon ki duniya

ye duniya agar mil bhi jae to kya hai

har ek jism ghayal har ek ruh pyasi

nigahon mein uljhan dilon mein udasi

ye duniya hai ya aalam-e-bad-hawasi

ye duniya agar mil bhi jae to kya hai

yahan ek khilauna hai insan ki hasti

ye basti hai murda-paraston ki basti

yahan par to jiwan se hai maut sasti

ye duniya agar mil bhi jae to kya hai

jawani bhaTakti hai bad-kar ban kar

jawan jism sajte hain bazar ban kar

yahan pyar hota hai bewpar ban kar

ye duniya agar mil bhi jae to kya hai

ye duniya jahan aadmi kuchh nahin hai

wafa kuchh nahin dosti kuchh nahin hai

jahan pyar ki qadr hi kuchh nahin hai

ye duniya agar mil bhi jae to kya hai

jala do ise phunk Dalo ye duniya

mere samne se haTa lo ye duniya

tumhaari hai tum hi sambhaalo ye duniya

ye duniya agar mil bhi jae to kya hai