duniya mein jannat

bāġhoñ ne pahnā

phūloñ kā gahnā

nahroñ kā bahnā

vārafta rahnā

duniyā meñ jannat merā vatan hai

bhūrī ghaTā.eñ

laa.eñ havā.eñ

bāġhoñ meñ jaa.eñ

kaliyāñ khilā.eñ

duniyā meñ jannat merā vatan hai

ik jhoñpaḌī hai

sab kuchh yahī hai

kyā sādgī hai

kyā zindagī hai

duniyā meñ jannat merā vatan hai

'krishn' kanhaiyā

rādhā kā rasiyā

bachchoñ ke 'afsar'

thā is zamīñ kā

raushan sitārā

duniyā meñ jannat merā vatan hai

vo turk aa.e

bhārat pe chhā.e

jhanDe uḌaa.e

qur.ān laa.e

duniyā meñ jannat merā vatan hai

chishtī ne baḳhshā

dil ko sahārā

hamdard aisā

kis ko milā thā

duniyā meñ jannat merā vatan hai

gautam kā ghar hai

jannat kā dar hai

'afsar' kidhar hai

kyā be-ḳhabar hai

duniyā meñ jannat merā vatan hai

baghon ne pahna

phulon ka gahna

nahron ka bahna

warafta rahna

duniya mein jannat mera watan hai

bhuri ghaTaen

laen hawaen

baghon mein jaen

kaliyan khilaen

duniya mein jannat mera watan hai

ek jhonpaDi hai

sab kuchh yahi hai

kya sadgi hai

kya zindagi hai

duniya mein jannat mera watan hai

'krishn' kanhaiya

radha ka rasiya

bachchon ke 'afsar'

tha is zamin ka

raushan sitara

duniya mein jannat mera watan hai

wo turk aae

bhaarat pe chhae

jhanDe uDae

quran lae

duniya mein jannat mera watan hai

chishti ne baKHsha

dil ko sahaara

hamdard aisa

kis ko mila tha

duniya mein jannat mera watan hai

gautam ka ghar hai

jannat ka dar hai

'afsar' kidhar hai

kya be-KHabar hai

duniya mein jannat mera watan hai