dusra ban-bas

raam ban-bās se jab lauT ke ghar meñ aa.e

yaad jañgal bahut aayā jo nagar meñ aa.e

raqs-e-dīvāngī āñgan meñ jo dekhā hogā

chhe december ko shrī raam ne sochā hogā

itne dīvāne kahāñ se mire ghar meñ aa.e

jagmagāte the jahāñ raam ke qadmoñ ke nishāñ

pyaar kī kāhkashāñ letī thī añgḌā.ī jahāñ

moḌ nafrat ke usī rāhguzar meñ aa.e

dharm kyā un kā thaa, kyā zaat thii, ye jāntā kaun

ghar na jaltā to unheñ raat meñ pahchāntā kaun

ghar jalāne ko mirā log jo ghar meñ aa.e

shākāhārī the mere dost tumhāre ḳhanjar

tum ne bābar kī taraf pheñke the saare patthar

hai mire sar kī ḳhatā, zaḳhm jo sar meñ aa.e

paañv sarjū meñ abhī raam ne dho.e bhī na the

ki nazar aa.e vahāñ ḳhuun ke gahre dhabbe

paañv dho.e binā sarjū ke kināre se uThe

raam ye kahte hue apne dvāre se uThe

rājdhānī kī fazā aa.ī nahīñ raas mujhe

chhe december ko milā dūsrā ban-bās mujhe

ram ban-bas se jab lauT ke ghar mein aae

yaad jangal bahut aaya jo nagar mein aae

raqs-e-diwangi aangan mein jo dekha hoga

chhe december ko shri ram ne socha hoga

itne diwane kahan se mere ghar mein aae

jagmagate the jahan ram ke qadmon ke nishan

pyar ki kahkashan leti thi angDai jahan

moD nafrat ke usi rahguzar mein aae

dharm kya un ka tha, kya zat thi, ye jaanta kaun

ghar na jalta to unhen raat mein pahchanta kaun

ghar jalane ko mera log jo ghar mein aae

shakahaari the mere dost tumhaare KHanjar

tum ne babar ki taraf phenke the sare patthar

hai mere sar ki KHata, zaKHm jo sar mein aae

panw sarju mein abhi ram ne dhoe bhi na the

ki nazar aae wahan KHun ke gahre dhabbe

panw dhoe bina sarju ke kinare se uThe

ram ye kahte hue apne dware se uThe

rajdhani ki faza aai nahin ras mujhe

chhe december ko mila dusra ban-bas mujhe