etiraf

baat kahnā nahīñ aatī mujhe likhnā nahīñ aatā

satr kahne kā hunar nazm banāne kā salīqa

baat karne kā qarīna mujhe kuchh bhī nahīñ aatā

koī sūrat fan-e-arz-e-hunar aa jaa.e mujhe bhī

shaam ko shaam kahūñ aur nigāhoñ pe añdhere utar aa.eñ

sub.h ko sub.h likhūñ aur pas-e-satr-e-tapāñ dhūp-bharā din nikal aa.e

kal bhī tāsīr-e-tahī thā mirā dāmān-e-suḳhan aaj bhī tāsīr-e-tahī hai

merā dāmān-e-duā sar-e-darbār-e-atā aaj bhī faizān-e-talab hai

mere maulā terā banda tire ikrām ke laa.eq nahīñ lekin

merā bachpan tire in.aam kā shā.eq hai abhī tak

kyā kahūñ koī bhī shai asl pe qaa.em nahīñ rahtī

baat pairā.e ke sahrā meñ nikal jaa.e to ghar lauT na paa.e

isti.āre kī zabāñ chāTne aa jaa.e mire ijz kī shoḳhī mire jazboñ kī harārat mire lafzoñ kī basārat

har kināya mire tapte hue jazbāt-e-tapāñ raakh kī jhillī kī tarah oT meñ le le

sāf-shaffāf tapāñ raakh kī chādar

haule haule mire jazbāt ke sar tak sarak aa.e

mere maulā mirā fan bhī mirī be-jān mohabbat kī tarah nam se tahī hai

phir bhī ai mālik-e-izzat

jaane kyuuñ mere gul-andām murabbī mujhe chhūne pe razā-mand nahīñ haiñ

jaane kyuuñ mere gul-andām ko Dar hai

raakh ke Dher meñ shāyad koī jazba abhī zinda ho aur is dast

hinā-rañg kī poreñ na jhulas de

lafz bhobhal kī taheñ haiñ

ātish-e-jazb kahīñ sarv-e-falak-bos kā dāman na jalā de

mere maulā mujhe kuchh bhī nahīñ aatā

baat karne kā hunar sher sunāne kā salīqa

mere vāris mirā siina tirā ghar hai

mere mohsin tirā ghar bāb-e-kushā hai

koī aa.e mirā dil bāb-e-kushā hai

lafz bhobhal kī taheñ haiñ

sach to ye hai mirī bhobhal mirī be-jān mohabbat kī tarah ġham se tahī hai

baat kahna nahin aati mujhe likhna nahin aata

satr kahne ka hunar nazm banane ka saliqa

baat karne ka qarina mujhe kuchh bhi nahin aata

koi surat fan-e-arz-e-hunar aa jae mujhe bhi

sham ko sham kahun aur nigahon pe andhere utar aaen

subh ko subh likhun aur pas-e-satr-e-tapan dhup-bhara din nikal aae

kal bhi tasir-e-tahi tha mera daman-e-suKHan aaj bhi tasir-e-tahi hai

mera daman-e-dua sar-e-darbar-e-ata aaj bhi faizan-e-talab hai

mere maula tera banda tere ikram ke laeq nahin lekin

mera bachpan tere inam ka shaeq hai abhi tak

kya kahun koi bhi shai asl pe qaem nahin rahti

baat pairae ke sahra mein nikal jae to ghar lauT na pae

istiare ki zaban chaTne aa jae mere ijz ki shoKHi mere jazbon ki hararat mere lafzon ki basarat

har kinaya mere tapte hue jazbaat-e-tapan rakh ki jhilli ki tarah oT mein le le

saf-shaffaf tapan rakh ki chadar

haule haule mere jazbaat ke sar tak sarak aae

mere maula mera fan bhi meri be-jaan mohabbat ki tarah nam se tahi hai

phir bhi ai malik-e-izzat

jaane kyun mere gul-andam murabbi mujhe chhune pe raza-mand nahin hain

jaane kyun mere gul-andam ko Dar hai

rakh ke Dher mein shayad koi jazba abhi zinda ho aur is dast

hina-rang ki poren na jhulas de

lafz bhobhal ki tahen hain

aatish-e-jazb kahin sarw-e-falak-bos ka daman na jala de

mere maula mujhe kuchh bhi nahin aata

baat karne ka hunar sher sunane ka saliqa

mere waris mera sina tera ghar hai

mere mohsin tera ghar bab-e-kusha hai

koi aae mera dil bab-e-kusha hai

lafz bhobhal ki tahen hain

sach to ye hai meri bhobhal meri be-jaan mohabbat ki tarah gham se tahi hai