etiraf

maiñ ne ḳhvāboñ ke saman-rañg shabistānoñ meñ

loriyāñ de ke ġham-e-dil ko sulānā chāhā

talḳhī-e-zīst se be-zār-o-pareshāñ ho kar

talḳhī-e-zīst kā ehsās miTānā chāhā

aur maiñ Darte jhijakte kisī mujrim kī tarah

aa gayā terī mohabbat ke paristānoñ meñ

chhoḌ kar apne ta.āqub meñ nigāheñ apnī

kho gayā kākul-o-ruḳhsār ke afsānoñ meñ

maiñ ne sochā thā tire jism kī ra.anā.ī se

sañg-dil zehn kī taqdīr badal jā.egī

zindagī vaqt ke sahrā kī alamnāk sumūm

tere anfās kī mahkār meñ Dhal jā.egī

aah ik lamha bhī lekin mire siine kī taḌap

tere gaate hue māhaul ko apnā na sakī

terī zulfoñ ke ghane aur ḳhunuk saa.e meñ

mere jalte hue idrāk ko niiñd aa na sakī

terī hañstī huī labrez chhalaktī āñkheñ

merī āñkhoñ meñ kabhī rañg-e-tarab bhar na sakīñ

tere dāman kī havā.eñ thiiñ junūñ-ḳhez magar

mere ehsās kī qindīl ko gul kar na sakīñ

maiñ ne sochā thā magar kitnā ġhalat sochā thā

zindagī ek haqīqat thī fasāna to na thī

merī duniyā mire ḳhvāboñ kī sunahrī duniyā

nauha-e-ġham thī masarrat kā tarāna to na thī

ab ye samjhā huuñ ki is dard bharī duniyā meñ

mere āġhāz kā anjām yahī honā thā

ḳhvāb phir ḳhvāb the ḳhvāboñ kā bharosa kyā thā

hāsil-e-kāhish-e-nākām yahī honā thā

zehn par laakh fusūñ-kār taḳhayyul hoñ muhīt

laakh pardoñ meñ nigāhoñ ko chhupāyā jaa.e

talḳhī-e-zīst kā ehsās nahīñ miT saktā

talḳhī-e-zīst ko jab tak na miTāyā jaa.e

main ne KHwabon ke saman-rang shabistanon mein

loriyan de ke gham-e-dil ko sulana chaha

talKHi-e-zist se be-zar-o-pareshan ho kar

talKHi-e-zist ka ehsas miTana chaha

aur main Darte jhijakte kisi mujrim ki tarah

aa gaya teri mohabbat ke paristanon mein

chhoD kar apne taaqub mein nigahen apni

kho gaya kakul-o-ruKHsar ke afsanon mein

main ne socha tha tere jism ki ranai se

sang-dil zehn ki taqdir badal jaegi

zindagi waqt ke sahra ki alamnak sumum

tere anfas ki mahkar mein Dhal jaegi

aah ek lamha bhi lekin mere sine ki taDap

tere gate hue mahaul ko apna na saki

teri zulfon ke ghane aur KHunuk sae mein

mere jalte hue idrak ko nind aa na saki

teri hansti hui labrez chhalakti aankhen

meri aankhon mein kabhi rang-e-tarab bhar na sakin

tere daman ki hawaen thin junun-KHez magar

mere ehsas ki qindil ko gul kar na sakin

main ne socha tha magar kitna ghalat socha tha

zindagi ek haqiqat thi fasana to na thi

meri duniya mere KHwabon ki sunahri duniya

nauha-e-gham thi masarrat ka tarana to na thi

ab ye samjha hun ki is dard bhari duniya mein

mere aaghaz ka anjam yahi hona tha

KHwab phir KHwab the KHwabon ka bharosa kya tha

hasil-e-kahish-e-nakaam yahi hona tha

zehn par lakh fusun-kar taKHayyul hon muhit

lakh pardon mein nigahon ko chhupaya jae

talKHi-e-zist ka ehsas nahin miT sakta

talKHi-e-zist ko jab tak na miTaya jae