aaqibat-andesh beTe

purānī baat hai

lekin ye anhonī sī lagtī hai

hamesha un ke hoñToñ par

muqaddas āyatoñ kā vird rahtā thā

hamesha un kī peshānī

riyāzat aur ibādat kī nishānī ko liye

raushan rahā kartī

vo pān.cho vaqt

masjid ke mīnāroñ se azaañ dete

vo mīloñ pā-piyāda

tez dhūpoñ meñ safar karte

ḳhudā kī bartarī us kī ibādat ke liye

logoñ meñ jā kar

rāt-din tablīġh karte

log un ko marhabā kahte

hikāyat hai

vo barsoñ ba.ad

jab apne gharoñ ko lauT kar aa.e

unheñ ye dekh kar hairat huī thī

un ke beToñ ne

unheñ bilkul na pahchānā

gharoñ ke āñganoñ kī bāhamī taqsīm kar lī thī

makānoñ ke na.e naqshe banā.e the

aur un kī saarī chīzeñ vo

ġharīboñ aur mohtājoñ meñ jā kar

baañT aa.e the

purani baat hai

lekin ye anhoni si lagti hai

hamesha un ke honTon par

muqaddas aayaton ka wird rahta tha

hamesha un ki peshani

riyazat aur ibaadat ki nishani ko liye

raushan raha karti

wo pancho waqt

masjid ke minaron se azan dete

wo milon pa-piyaada

tez dhupon mein safar karte

KHuda ki bartari us ki ibaadat ke liye

logon mein ja kar

raat-din tabligh karte

log un ko marhaba kahte

hikayat hai

wo barson baad

jab apne gharon ko lauT kar aae

unhen ye dekh kar hairat hui thi

un ke beTon ne

unhen bilkul na pahchana

gharon ke aanganon ki bahami taqsim kar li thi

makanon ke nae naqshe banae the

aur un ki sari chizen wo

gharibon aur mohtajon mein ja kar

banT aae the