ummid

ziist yūñhī na rahegī maġhmūm

zindagānī ko badalnā hogā

laakh āmāda-e-shazish hai ye shab

is shab-e-tīra ko Dhalnā hogā

maut kā saaya laraztā hai to kyā

vaqt ālām ko laayā hai to kyā

nāma-e-ālām jo aayā hai to kyā

ġham ko sah jaa.eñ dilāvar ban kar

pī leñ dariyā ko samundar ban kar

ġham to aate hī raheñge paiham

āte-jāte hī raheñge har-dam

zaḳhm ḳhud paidā kareñge marham

ġham-o-andoh kī kuchh baat nahīñ

ye koī lamha-e-haihāt nahīñ

azm-e-parvāz na dene paa.e

apnī āvāz na dene paa.e

raat tārīk bhī sunsān bhī hai

azm ke giit to gaa.eñ aao

shab-e-dījūr ko raushan to kareñ

sham-e-ummīd jalā.eñ aao

zist yunhi na rahegi maghmum

zindagani ko badalna hoga

lakh aamada-e-shazish hai ye shab

is shab-e-tira ko Dhalna hoga

maut ka saya larazta hai to kya

waqt aalam ko laya hai to kya

nama-e-alam jo aaya hai to kya

gham ko sah jaen dilawar ban kar

pi len dariya ko samundar ban kar

gham to aate hi rahenge paiham

aate-jate hi rahenge har-dam

zaKHm KHud paida karenge marham

gham-o-andoh ki kuchh baat nahin

ye koi lamha-e-haihat nahin

azm-e-parwaz na dene pae

apni aawaz na dene pae

raat tarik bhi sunsan bhi hai

azm ke git to gaen aao

shab-e-dijur ko raushan to karen

sham-e-ummid jalaen aao