aabai makanon par sitara

zamāne bah ga.e kitne

vahī āñgan jo vus.at meñ mujhe duniyā lagā kartā thā

vo do jast niklā

jis jagah dālān thā

ab us jagah hamvār miTTī muñh chiḌātī hai

idhar hamvār miTTī se udhar

vo Dheriyāñ miTTī kī kab se muntazir haiñ

koī milne hī nahīñ aatā

yahīñ the vo

jo ab miTTī haiñ

jin ke ḳhāl-o-ḳhad puure badan par zor de kar yaad kartā

huuñ

yahīñ the vo

mire bakse meñ yādoñ aur dhāgoñ juḌī ainak to rakkhī

hai

magar daadā kī

niilī jhilmilāte pāniyoñ jaisī do āñkheñ bah ga.ī haiñ

aur daadī kī sunā.ī sab kathā.eñ

ḳhaak andar rah ga.ī haiñ

vaqt ab bhī bah rahā hai

merī āñkhoñ

aur qabroñ se

vahāñ āñgan ke sūkhe peḌ tak

saare meñ itnī ḳhaak uḌtī hai

dikhā.ī kuchh nahīñ detā

zamane bah gae kitne

wahi aangan jo wusat mein mujhe duniya laga karta tha

wo do jast nikla

jis jagah dalan tha

ab us jagah hamwar miTTi munh chiDati hai

idhar hamwar miTTi se udhar

wo Dheriyan miTTi ki kab se muntazir hain

koi milne hi nahin aata

yahin the wo

jo ab miTTi hain

jin ke KHal-o-KHad pure badan par zor de kar yaad karta

hun

yahin the wo

mere bakse mein yaadon aur dhagon juDi ainak to rakkhi

hai

magar dada ki

nili jhilmilate paniyon jaisi do aankhen bah gai hain

aur dadi ki sunai sab kathaen

KHak andar rah gai hain

waqt ab bhi bah raha hai

meri aankhon

aur qabron se

wahan aangan ke sukhe peD tak

sare mein itni KHak uDti hai

dikhai kuchh nahin deta