mumbai

shahr mumbai

mujhe us ne chunā hai ham-safar apnā

ye merī saañs ke marne talak

saa.e kī tarah saath meñ hogā

shahr aisā

jo ujlī raushnī meñ Duubā rahtā hai

magar un raushnī ke jhurmuT meñ tīrgī bhī hai

jahāñ bāzār zinda hai

jahāñ rūhoñ kā saudā rāt-din hotā hī rahtā hai

jahāñ apnoñ se lagte haiñ na jaane kitne begāne

nazar jis samt bhī pheñko

yahāñ ūñchī imārat ke sivā kuchh bhī nahīñ hai

yahāñ arz-e-duā mehr-o-vafā kuchh bhī nahīñ hai

ka.ī lāsheñ bhaTaktī rahtī haiñ be-rūh nukkaḌ par

jahāñ ruktī haiñ lambī gāḌiyāñ aa kar

maiñ aksar sochtā huuñ ye

na jaane kaun baiThā rahtā hai un band shīshoñ meñ

shahr-e-mumbai

mujhe us ne chunā hai ham-safar apnā

ye merī saañs ke marne talak

saa.e kī tarah saath meñ hogā

shahr aisā

jo gahrī niiñd meñ bhī chaltā rahtā hai

ḳhushī se khol kar āñkheñ

jo saare ḳhvāb buntā hai

shahr ye ek jañgal hai

jahāñ āñkheñ hī āñkheñ haiñ

hazāroñ phuul sī āñkheñ hazāroñ phathrī āñkheñ

hazāroñ ḳhushnumā āñkheñ hazāroñ mātamī āñkheñ

hazāroñ āshnā āñkheñ hazāroñ ajnabī āñkheñ

sabhī āñkhoñ kī palkoñ par

udāsī aise baiThī hai

ki jaise saañp koī kunDalī maare hue baiThe

vo palkeñ jāntī haiñ

kaise apnā dukh chhupānā hai

magar jab ġhaur se dekho to yuuñ mahsūs hotā hai

vo palkeñ sabr haiñ aur jabr haiñ

aur qabr haiñ āñkheñ

jahāñ par dafn haiñ yādeñ kisī marhūm bachche kī

shahr-e-mumbai

mujhe us ne chunā hai ham-safar apnā

ye merī saañs ke marne talak

saa.e kī tarah saath meñ hogā

shahr aisā

jo bahte vaqt ko muTThī meñ rakhtā hai

isī kī kokh meñ apne parā.e vaqt kī pahchān hotī hai

shahr kī god meñ hai ik samundar bhī

jo ghanToñ dhuup kī chhatrī lagā.e baiThā rahtā hai

hasīñ sāhil ke retoñ par

vahīñ par bādaloñ se ek nannhī shaam aatī hai

sirā us shaam kā rātoñ meñ khultā hai

fazā kā shor jab din kī bajā.e narm hotā hai

makāñ kī oT meñ jab chāñd piilā chhupne lagtā hai

sitāre ūñghne lagte haiñ jab halkān ho ho kar

to aapas meñ gale lag kar

samundar ke kināre rone lagte haiñ

maiñ us bhīge hue lamhe kā ik tanhā gavāhī huuñ

maiñ manzar kī siyāhī huuñ

maiñ ik aisā sipāhī huuñ

jise ab zindagī kī āḳhirī ik jañg laḌnī hai

mirā ab saath degā ye

shahr-e-mumbai

jise maiñ ne chunā hai ham-safar apnā

jo merī saañs ke marne talak

saa.e kī tarah saath meñ hogā

shahr mumbai

mujhe us ne chuna hai ham-safar apna

ye meri sans ke marne talak

sae ki tarah sath mein hoga

shahr aisa

jo ujli raushni mein Duba rahta hai

magar un raushni ke jhurmuT mein tirgi bhi hai

jahan bazar zinda hai

jahan ruhon ka sauda raat-din hota hi rahta hai

jahan apnon se lagte hain na jaane kitne begane

nazar jis samt bhi phenko

yahan unchi imarat ke siwa kuchh bhi nahin hai

yahan arz-e-dua mehr-o-wafa kuchh bhi nahin hai

kai lashen bhaTakti rahti hain be-ruh nukkaD par

jahan rukti hain lambi gaDiyan aa kar

main aksar sochta hun ye

na jaane kaun baiTha rahta hai un band shishon mein

shahr-e-mumbai

mujhe us ne chuna hai ham-safar apna

ye meri sans ke marne talak

sae ki tarah sath mein hoga

shahr aisa

jo gahri nind mein bhi chalta rahta hai

KHushi se khol kar aankhen

jo sare KHwab bunta hai

shahr ye ek jangal hai

jahan aankhen hi aankhen hain

hazaron phul si aankhen hazaron phathri aankhen

hazaron KHushnuma aankhen hazaron matami aankhen

hazaron aashna aankhen hazaron ajnabi aankhen

sabhi aankhon ki palkon par

udasi aise baiThi hai

ki jaise sanp koi kunDali mare hue baiThe

wo palken jaanti hain

kaise apna dukh chhupana hai

magar jab ghaur se dekho to yun mahsus hota hai

wo palken sabr hain aur jabr hain

aur qabr hain aankhen

jahan par dafn hain yaaden kisi marhum bachche ki

shahr-e-mumbai

mujhe us ne chuna hai ham-safar apna

ye meri sans ke marne talak

sae ki tarah sath mein hoga

shahr aisa

jo bahte waqt ko muTThi mein rakhta hai

isi ki kokh mein apne parae waqt ki pahchan hoti hai

shahr ki god mein hai ek samundar bhi

jo ghanTon dhup ki chhatri lagae baiTha rahta hai

hasin sahil ke reton par

wahin par baadalon se ek nannhi sham aati hai

sira us sham ka raaton mein khulta hai

faza ka shor jab din ki bajae narm hota hai

makan ki oT mein jab chand pila chhupne lagta hai

sitare unghne lagte hain jab halkan ho ho kar

to aapas mein gale lag kar

samundar ke kinare rone lagte hain

main us bhige hue lamhe ka ek tanha gawahi hun

main manzar ki siyahi hun

main ek aisa sipahi hun

jise ab zindagi ki aaKHiri ek jang laDni hai

mera ab sath dega ye

shahr-e-mumbai

jise main ne chuna hai ham-safar apna

jo meri sans ke marne talak

sae ki tarah sath mein hoga