east india company ke farzandon se KHitab

kis zabāñ se kah rahe ho aaj tum saudāgaro

dahr meñ insāniyat ke naam ko ūñchā karo

jis ko sab kahte haiñ hitler bheḌiyā hai bheḌiyā

bheḌiye ko maar do golī pa.e-amn-o-baqā

bāġh-e-insānī meñ chalne hī pe hai bād-e-ḳhizāñ

ādamiyyat le rahī hai hichkiyoñ par hichkiyāñ

haath hai hitler kā raḳhsh-e-ḳhud-sarī kī baag par

teġh kā paanī chhiḌak do germany kī aag par

saḳht hairāñ huuñ ki mahfil meñ tumhārī aur ye zikr

nau-e-insānī ke mustaqbil kī ab karte ho fikr

jab yahāñ aa.e the tum saudāgarī ke vāste

nau-e-insānī ke mustaqbil se kiyā vāqif na the

hindiyoñ ke jism meñ kyā rūh-e-āzādī na thī

sach batāo kyā vo insānoñ kī ābādī na thī

apne zulm-e-be-nihāyat kā fasāna yaad hai

company kā phir vo daur-e-mujrimāna yaad hai

lūTte phirte the jab tum kārvāñ-dar-kārvāñ

sar-barahna phir rahī thī daulat-e-hindostāñ

dast-kāroñ ke añgūThe kāTte phirte the tum

sard lāshoñ se gaḌhoñ ko pāTte phirte the tum

san.at-e-hindostāñ par maut thī chhā.ī huī

maut bhī kaisī tumhāre haat kī laa.ī huī

allāh allāh kis qadar insāf ke tālib ho aaj

mīr-ja.afar kī qasam kyā dushman-e-haq thā 'sirāj'

kyā avadh kī begamoñ kā bhī satānā yaad hai

yaad hai jhāñsī kī raanī kā zamāna yaad hai

hijrat-e-sultān-e-dehlī kā samāñ bhī yaad hai

sher-dil 'Tīpū' kī ḳhūnīñ dāstāñ bhī yaad hai

tīsare faaqe meñ ik girte hue ko thāmne

kas ke tum laa.e the sar shāh-e-zafar ke sāmne

yaad to hogī vo maTiyā-burj kī bhī dāstāñ

ab bhī jis kī ḳhaak se uThtā hai rah rah kar dhuāñ

tum ne qaisar-e-bāġh ko dekhā to hogā bārhā

aaj bhī aatī hai jis se haa.e 'aḳhtar' kī sadā

sach kaho kyā hāfize meñ hai vo zulm-e-be-panāh

aaj tak ragōn meñ ik qabr hai jis kī gavāh

zehn meñ hogā ye taaza hindiyoñ kā daaġh bhī

yaad to hogā tumheñ jallianwala-bagh bhī

pūchh lo is se tumhārā naam kyuuñ tābinda hai

'dyer'-e-gurg-e-dahan-ālūd ab bhī zinda hai

vo 'bhagat-singh' ab bhī jis ke ġham meñ dil nāshād hai

us kī gardan meñ jo Daalā thā vo phandā yaad hai

ahl-e-āzādī rahā karte the kis hanjār se

pūchh lo ye qaid-ḳhānoñ ke dar-o-dīvār se

ab bhī hai mahfūz jis par tantana sarkār kā

aaj bhī gūñjī huī hai jin meñ koḌoñ kī sadā

aaj kashtī amn ke amvāj par khete ho kyuuñ

saḳht hairāñ huuñ ki ab tum dars-e-haq dete ho kyuuñ

ahl-e-quvvat dām-e-haq meñ to kabhī aate nahīñ

''bankī'' aḳhlāq ko ḳhatre meñ bhī laate nahīñ

lekin aaj aḳhlāq kī talqīn farmāte ho tum

ho na ho apne meñ ab quvvat nahīñ paate ho tum

ahl-e-haq raushan-nazar haiñ ahl-e-bātin kor haiñ

ye to haiñ aqvāl un qaumoñ ke jo kamzor haiñ

aaj shāyad manzil-e-quvvat meñ tum rahte nahīñ

jis kī lāThī us kī bhaiñs ab kis liye kahte nahīñ

kyā kahā insāf hai insāñ kā farz-e-avvalīñ

kyā fasād-o-zulm kā ab tum meñ kas baaqī nahīñ

der se baiThe ho naḳhl-e-rāstī kī chhāñv meñ

kyā ḳhudā-nā-karda kuchh moch aa ga.ī hai paañv meñ

guuñj Tāpoñ kī na ābādī na vīrāne meñ hai

ḳhair to hai asp-e-tāzī kyā shifā-ḳhāne meñ hai

aaj kal to har nazar meñ rahm kā andāz hai

kuchh tabī.at kyā nasīb-e-dushmanāñ nā-sāz hai

saañs kyā ukhḌī ki haq ke naam par marne lage

nau-e-insāñ kī havā-ḳhvāhī kā dam bharne lage

zulm bhūle rāgnī insāf kī gaane lage

lag ga.ī hai aag kyā ghar meñ ki chillāne lage

mujrmoñ ke vāste zebā nahīñ ye shor-o-shain

kal 'yazīd' o 'shimr' the aur aaj bante ho 'husain'

ḳhair ai saudāgaro ab hai to bas is baat meñ

vaqt ke farmān ke aage jhukā do gardaneñ

ik kahānī vaqt likkhegā na.e mazmūn kī

jis kī surḳhī ko zarūrat hai tumhāre ḳhuun kī

vaqt kā farmān apnā ruḳh badal saktā nahīñ

maut Tal saktī hai ab farmān Tal saktā nahīñ

kis zaban se kah rahe ho aaj tum saudagaro

dahr mein insaniyat ke nam ko uncha karo

jis ko sab kahte hain hitler bheDiya hai bheDiya

bheDiye ko mar do goli pae-amn-o-baqa

bagh-e-insani mein chalne hi pe hai baad-e-KHizan

aadamiyyat le rahi hai hichkiyon par hichkiyan

hath hai hitler ka raKHsh-e-KHud-sari ki bag par

tegh ka pani chhiDak do germany ki aag par

saKHt hairan hun ki mahfil mein tumhaari aur ye zikr

nau-e-insani ke mustaqbil ki ab karte ho fikr

jab yahan aae the tum saudagari ke waste

nau-e-insani ke mustaqbil se kiya waqif na the

hindiyon ke jism mein kya ruh-e-azadi na thi

sach batao kya wo insanon ki aabaadi na thi

apne zulm-e-be-nihayat ka fasana yaad hai

company ka phir wo daur-e-mujrimana yaad hai

luTte phirte the jab tum karwan-dar-karwan

sar-barahna phir rahi thi daulat-e-hindostan

dast-karon ke anguThe kaTte phirte the tum

sard lashon se gaDhon ko paTte phirte the tum

sanat-e-hindostan par maut thi chhai hui

maut bhi kaisi tumhaare hat ki lai hui

allah allah kis qadar insaf ke talib ho aaj

mir-jafar ki qasam kya dushman-e-haq tha 'siraj'

kya awadh ki begamon ka bhi satana yaad hai

yaad hai jhansi ki rani ka zamana yaad hai

hijrat-e-sultan-e-dehli ka saman bhi yaad hai

sher-dil 'Tipu' ki KHunin dastan bhi yaad hai

tisare faqe mein ek girte hue ko thamne

kas ke tum lae the sar shah-e-zafar ke samne

yaad to hogi wo maTiya-burj ki bhi dastan

ab bhi jis ki KHak se uThta hai rah rah kar dhuan

tum ne qaisar-e-bagh ko dekha to hoga barha

aaj bhi aati hai jis se hae 'aKHtar' ki sada

sach kaho kya hafize mein hai wo zulm-e-be-panah

aaj tak ragoon mein ek qabr hai jis ki gawah

zehn mein hoga ye taza hindiyon ka dagh bhi

yaad to hoga tumhein jallianwala-bagh bhi

puchh lo is se tumhaara nam kyun tabinda hai

'dyer'-e-gurg-e-dahan-alud ab bhi zinda hai

wo 'bhagat-singh' ab bhi jis ke gham mein dil nashad hai

us ki gardan mein jo Dala tha wo phanda yaad hai

ahl-e-azadi raha karte the kis hanjar se

puchh lo ye qaid-KHanon ke dar-o-diwar se

ab bhi hai mahfuz jis par tantana sarkar ka

aaj bhi gunji hui hai jin mein koDon ki sada

aaj kashti amn ke amwaj par khete ho kyun

saKHt hairan hun ki ab tum dars-e-haq dete ho kyun

ahl-e-quwwat dam-e-haq mein to kabhi aate nahin

banki aKHlaq ko KHatre mein bhi late nahin

lekin aaj aKHlaq ki talqin farmate ho tum

ho na ho apne mein ab quwwat nahin pate ho tum

ahl-e-haq raushan-nazar hain ahl-e-baatin kor hain

ye to hain aqwal un qaumon ke jo kamzor hain

aaj shayad manzil-e-quwwat mein tum rahte nahin

jis ki laThi us ki bhains ab kis liye kahte nahin

kya kaha insaf hai insan ka farz-e-awwalin

kya fasad-o-zulm ka ab tum mein kas baqi nahin

der se baiThe ho naKHl-e-rasti ki chhanw mein

kya KHuda-na-karda kuchh moch aa gai hai panw mein

gunj Tapon ki na aabaadi na virane mein hai

KHair to hai asp-e-tazi kya shifa-KHane mein hai

aaj kal to har nazar mein rahm ka andaz hai

kuchh tabiat kya nasib-e-dushmanan na-saz hai

sans kya ukhDi ki haq ke nam par marne lage

nau-e-insan ki hawa-KHwahi ka dam bharne lage

zulm bhule ragni insaf ki gane lage

lag gai hai aag kya ghar mein ki chillane lage

mujrmon ke waste zeba nahin ye shor-o-shain

kal 'yazid' o 'shimr' the aur aaj bante ho 'husain'

KHair ai saudagaro ab hai to bas is baat mein

waqt ke farman ke aage jhuka do gardanen

ek kahani waqt likkhega nae mazmun ki

jis ki surKHi ko zarurat hai tumhaare KHun ki

waqt ka farman apna ruKH badal sakta nahin

maut Tal sakti hai ab farman Tal sakta nahin