muntazar saya-e-muntazir aankhen

ġhairat hai ki hayā

naam us kā na liyā jis ko pukārā us ne

us ga.ī raat ke sannāTe meñ kaun aayā hai

band darvāze ke majas meñ to siitā hī hai

aur bāhar

koī rāvan to nahīñ

kaun hai kaun kī sahmī sī sadā

vo bhī kuchh kah na sakā maiñ ke sivā

dastakeñ raam ke maḳhsūs zabāñ rakhtī haiñ

gosh-e-sītā ke liye muzhda-e-jāñ rakhtī haiñ

bulb raushan huā aur chaap qadam kī ubhrī

chūḌiyāñ bol uThīñ

uñgliyāñ kaaTh kī mizrāb pe phir reñg ga.iiñ

donoñ paT ḳhvāb se chauñke to ma.an chīḳh uThe

ek hañgāma huā raat kā afsūñ TuuTā

muntazar sāya-e-ḳhajālat ke dhuāñ se ubhrā

raat kaafī huī tum jaag rahī ho ab tak

aaj phir der huī

asal meñ aaj ajab baat huī

Thiik hai Thiik koī baat nahīñ

muntazir shāḳh jo lachkī to ka.ī phuul jhaḌe

aap muñh haath to dho leñ pahle

aur minToñ meñ maiñ saal ko zarā garm karūñ

pyaar kī aag bhī raushan huī stove ke saath

dasht-e-tanhā.ī ke ifrīt bahut duur hue

vasvase jitne the dil meñ sabhī kāfūr hue

harakat aur harārat meñ magan donoñ badan

ye kirāya kā makāñ hai ki mohabbat kā chaman

ek ek luqma pe hotī haiñ nigāheñ do-chār

ek ek jur.e meñ mahlūl tabassum kī bahār

muztarib dil meñ munavvar haiñ masarrat ke charāġh

jānī-pahchānī sī ḳhushbū meñ hai mas.hūr-e-dimāġh

āñkhoñ āñkhoñ meñ siyah raat kaTegī ab to

hoñT se hoñT kī sauġhāt baTegī ab to

ghairat hai ki haya

nam us ka na liya jis ko pukara us ne

us gai raat ke sannaTe mein kaun aaya hai

band darwaze ke majas mein to sita hi hai

aur bahar

koi rawan to nahin

kaun hai kaun ki sahmi si sada

wo bhi kuchh kah na saka main ke siwa

dastaken ram ke maKHsus zaban rakhti hain

gosh-e-sita ke liye muzhda-e-jaan rakhti hain

bulb raushan hua aur chap qadam ki ubhri

chuDiyan bol uThin

ungliyan kaTh ki mizrab pe phir reng gain

donon paT KHwab se chaunke to man chiKH uThe

ek hangama hua raat ka afsun TuTa

muntazar saya-e-KHajalat ke dhuan se ubhra

raat kafi hui tum jag rahi ho ab tak

aaj phir der hui

asal mein aaj ajab baat hui

Thik hai Thik koi baat nahin

muntazir shaKH jo lachki to kai phul jhaDe

aap munh hath to dho len pahle

aur minTon mein main sal ko zara garm karun

pyar ki aag bhi raushan hui stowe ke sath

dasht-e-tanhai ke ifrit bahut dur hue

waswase jitne the dil mein sabhi kafur hue

harakat aur hararat mein magan donon badan

ye kiraya ka makan hai ki mohabbat ka chaman

ek ek luqma pe hoti hain nigahen do-chaar

ek ek jure mein mahlul tabassum ki bahaar

muztarib dil mein munawwar hain masarrat ke charagh

jaani-pahchani si KHushbu mein hai mashur-e-dimagh

aankhon aankhon mein siyah raat kaTegi ab to

honT se honT ki saughat baTegi ab to