ye bachcha kis ka bachcha hai

1

ye bachcha kaisā bachcha hai

ye bachcha kaalā kaalā sā

ye kaalā sā maTiyālā sā

ye bachcha bhūkā bhūkā sā

ye bachcha sūkhā sūkhā sā

ye bachcha kis kā bachcha hai

ye bachcha kaisā bachcha hai

jo ret pe tanhā baiThā hai

nā is ke peT meñ roTī hai

nā is ke tan par kapḌā hai

nā is ke sar par Topī hai

nā is ke pair meñ juutā hai

nā is ke paas khilaunoñ meñ

koī bhālū hai, koī ghoḌā hai

nā is kā jī bahlāne ko

koī lorī hai, koī jhūlā hai

nā is kī jeb meñ dhelā hai

nā is ke haath meñ paisā hai

nā is ke ammī abbū haiñ

nā is kī aapā ḳhālā hai

ye saare jag meñ tanhā hai

ye bachcha kaisā bachcha hai

2

ye sahrā kaisā sahrā hai

nā is sahrā meñ bādal hai

nā is sahrā meñ barkhā hai

nā is sahrā meñ baalī hai

nā is sahrā meñ ḳhoshā hai

nā is sahrā meñ sabza hai

nā is sahrā meñ saayā hai

ye sahrā bhuuk kā sahrā hai

ye sahrā maut kā sahrā hai

3

ye bachcha kaise baiThā hai

ye bachcha kab se baiThā hai

ye bachcha kyā kuchh pūchhtā hai

ye bachcha kyā kuchh kahtā hai

ye duniyā kaisī duniyā hai

ye duniyā kis kī duniyā hai

4

is duniyā ke kuchh TukḌoñ meñ

kahīñ phuul khile kahīñ sabza hai

kahīñ bādal ghir ghir aate haiñ

kahīñ chashma hai kahīñ dariyā hai

kahīñ ūñche mahl aTāriyāñ haiñ

kahīñ mahfil hai kahīñ melā hai

kahīñ kapḌoñ ke bāzār saje

ye resham hai ye diibā hai

kahīñ ġhalle ke ambār lage

sab gehūñ dhaan muhayyā hai

kahīñ daulat ke sandūq bhare

haañ tāñbā sonā ruupā hai

tum jo māñgo so hāzir hai

tum jo chāho so miltā hai

is bhuuk ke dukh kī duniyā meñ

ye kaisā sukh kā sapnā hai

vo kis dhartī ke TukḌe haiñ

ye kis duniyā kā hissa hai

5

ham jis aadam ke beTe haiñ

ye us aadam kā beTā hai

ye aadam ek hī aadam hai

ye gorā hai yā kaalā hai

ye dhartī ek hī dhartī hai

ye duniyā ek hī duniyā hai

sab ik daatā ke bande haiñ

sab bandoñ kā ik daatā hai

kuchh pūrab pachchham farq nahīñ

is dhartī par haq sab kā hai

6

ye tanhā bachcha be-chāra

ye bachcha jo yahāñ baiThā hai

is bachche kī kahīñ bhuuk miTe

(kyā mushkil hai ho saktā hai)

is bachche ko kahīñ duudh mile

(haañ duudh yahāñ bahterā hai)

is bachche kā koī tan Dhāñke

(kyā kapḌoñ kā yahāñ toḌā hai)

is bachche ko koī god meñ le

(insān jo ab tak zinda hai)

phir dekhe kaisā bachcha hai

ye kitnā pyārā bachcha hai

7

is jag meñ sab kuchh rab kā hai

jo rab kā hai vo sab kā hai

sab apne haiñ koī ġhair nahīñ

har chiiz meñ sab kā sājhā hai

jo baḌhtā hai jo ugtā hai

vo daanā hai yā meva hai

jo kapḌā hai jo kambal hai

jo chāñdī hai jo sonā hai

vo saarā hai is bachche kā

jo terā hai jo merā hai

ye bachcha kis kā bachcha hai

ye bachcha sab kā bachcha hai!

1

ye bachcha kaisa bachcha hai

ye bachcha kala kala sa

ye kala sa maTiyala sa

ye bachcha bhuka bhuka sa

ye bachcha sukha sukha sa

ye bachcha kis ka bachcha hai

ye bachcha kaisa bachcha hai

jo ret pe tanha baiTha hai

na is ke peT mein roTi hai

na is ke tan par kapDa hai

na is ke sar par Topi hai

na is ke pair mein juta hai

na is ke pas khilaunon mein

koi bhaalu hai, koi ghoDa hai

na is ka ji bahlane ko

koi lori hai, koi jhula hai

na is ki jeb mein dhela hai

na is ke hath mein paisa hai

na is ke ammi abbu hain

na is ki aapa KHala hai

ye sare jag mein tanha hai

ye bachcha kaisa bachcha hai

2

ye sahra kaisa sahra hai

na is sahra mein baadal hai

na is sahra mein barkha hai

na is sahra mein baali hai

na is sahra mein KHosha hai

na is sahra mein sabza hai

na is sahra mein saya hai

ye sahra bhuk ka sahra hai

ye sahra maut ka sahra hai

3

ye bachcha kaise baiTha hai

ye bachcha kab se baiTha hai

ye bachcha kya kuchh puchhta hai

ye bachcha kya kuchh kahta hai

ye duniya kaisi duniya hai

ye duniya kis ki duniya hai

4

is duniya ke kuchh TukDon mein

kahin phul khile kahin sabza hai

kahin baadal ghir ghir aate hain

kahin chashma hai kahin dariya hai

kahin unche mahl aTariyan hain

kahin mahfil hai kahin mela hai

kahin kapDon ke bazar saje

ye resham hai ye diba hai

kahin ghalle ke ambar lage

sab gehun dhan muhayya hai

kahin daulat ke sanduq bhare

han tanba sona rupa hai

tum jo mango so hazir hai

tum jo chaho so milta hai

is bhuk ke dukh ki duniya mein

ye kaisa sukh ka sapna hai

wo kis dharti ke TukDe hain

ye kis duniya ka hissa hai

5

hum jis aadam ke beTe hain

ye us aadam ka beTa hai

ye aadam ek hi aadam hai

ye gora hai ya kala hai

ye dharti ek hi dharti hai

ye duniya ek hi duniya hai

sab ek data ke bande hain

sab bandon ka ek data hai

kuchh purab pachchham farq nahin

is dharti par haq sab ka hai

6

ye tanha bachcha be-chaara

ye bachcha jo yahan baiTha hai

is bachche ki kahin bhuk miTe

(kya mushkil hai ho sakta hai)

is bachche ko kahin dudh mile

(han dudh yahan bahtera hai)

is bachche ka koi tan Dhanke

(kya kapDon ka yahan toDa hai)

is bachche ko koi god mein le

(insan jo ab tak zinda hai)

phir dekhe kaisa bachcha hai

ye kitna pyara bachcha hai

7

is jag mein sab kuchh rab ka hai

jo rab ka hai wo sab ka hai

sab apne hain koi ghair nahin

har chiz mein sab ka sajha hai

jo baDhta hai jo ugta hai

wo dana hai ya mewa hai

jo kapDa hai jo kambal hai

jo chandi hai jo sona hai

wo sara hai is bachche ka

jo tera hai jo mera hai

ye bachcha kis ka bachcha hai

ye bachcha sab ka bachcha hai!