ehsas-e-nadamt

maiñ is ḳhayāl meñ thā bujh chukī hai ātish-e-dard

bhaḌak rahī thī mire dil meñ jo zamāne se

maiñ is ḳhayāl meñ thā ho chukī hai aag vo sard

vo ek shola-e-dard-āfrīñ matā-e-hayāt

maiñ is ḳhayāl meñ thā maiñ use bachā na sakā

gumāñ ye thā ki vo ik sho.ala-e-hayāt-afroz

havā-e-paris-o-london kī taab lā na sakā

maiñ sochtā thā ki shāyad bhulā chukā huuñ tujhe

jo apne dil kī kahānī tujhe sunānā thī

vo apne sāz-e-ġhazal par sunā chukā huuñ tujhe

kuchh aisā mujh ko gumāñ thā tufail-e-marham-e-vaqt

koī bhī ghaav ho ik roz bhar hī jaatā hai

zamāna vaqt ke parde pe har ghaḌī shāyad

nayā tilism na.ī dilkashī sajātā hai

jo haiñ rafīq-e-dil-o-jān un āñsuoñ kī qasam

tire huzūr abhī tak jo baar pā na sake

jinheñ hai tujh se sivā tirī aabrū kā ḳhayāl

jo dil meñ ruk na sake aur mizha tak aa na sakā

milā huuñ aaj maiñ tujh se to vasvase ye tamām

miTe ḳhayāl kī duniyā se misl-e-naqsh-bar-āb

pata chalā ki vo sho.ala bujhā nahīñ hai abhī

bas itnī baat hai ab jal rahā hai zer-e-naqāb

naqāb-e-vaqt-o-masāfat ke do dabīz hijāb

guzar ga.ī tirī furqat meñ zindagī jitnī

adn kī sub.h ki paris kī raat meñ guzrī

dil o nazar ke kisī vārdāt meñ guzrī

ki ik hasīna-e-ālam se baat meñ guzrī

faqat vo ek nadāmat hai aur kuchh bhī nahīñ

aur aaj merī nadāmat kā ye shadīd ehsās

har ek saañs meñ mujh se savāl kartā hai

havas hai ishq se kitne qadam? do-chār qadam?

kiyā hai fāsla un meñ ka.ī hazār qadam?

piccadily meñ bhī ham yaad the tujhe ki na the

pigalle meñ bhī ḳhalish koī dil meñ thī kī na thī

vo shaam thames kī ab bhī nazar meñ hai ki nahīñ

ki jab havas kī nazar par koī hijāb na thā

vo sat.h-e-bahr pe raqsāñ jahāz kā arshā

aur us pe chaar taraf ek nuur kā aalam

ki jaise barq-e-tajallī-e-tūr kā aalam

valentia meñ vo raqs-e-barahnagī ke tilism

tirī nigāh-e-tamāshā ko kuchh jhijak to na thī

ye ik savāl ki jis ke hazār pahlū haiñ

maiñ ek lamhe ko jab in pe ġhaur kartā huuñ

to sochtā huuñ kī maiñ tujh se ab malūñ na malūñ

main is KHayal mein tha bujh chuki hai aatish-e-dard

bhaDak rahi thi mere dil mein jo zamane se

main is KHayal mein tha ho chuki hai aag wo sard

wo ek shola-e-dard-afrin mata-e-hayat

main is KHayal mein tha main use bacha na saka

guman ye tha ki wo ek shoala-e-hayat-afroz

hawa-e-paris-o-london ki tab la na saka

main sochta tha ki shayad bhula chuka hun tujhe

jo apne dil ki kahani tujhe sunana thi

wo apne saz-e-ghazal par suna chuka hun tujhe

kuchh aisa mujh ko guman tha tufail-e-marham-e-waqt

koi bhi ghaw ho ek roz bhar hi jata hai

zamana waqt ke parde pe har ghaDi shayad

naya tilism nai dilkashi sajata hai

jo hain rafiq-e-dil-o-jaan un aansuon ki qasam

tere huzur abhi tak jo bar pa na sake

jinhen hai tujh se siwa teri aabru ka KHayal

jo dil mein ruk na sake aur mizha tak aa na saka

mila hun aaj main tujh se to waswase ye tamam

miTe KHayal ki duniya se misl-e-naqsh-bar-ab

pata chala ki wo shoala bujha nahin hai abhi

bas itni baat hai ab jal raha hai zer-e-naqab

naqab-e-waqt-o-masafat ke do dabiz hijab

guzar gai teri furqat mein zindagi jitni

adn ki subh ki paris ki raat mein guzri

dil o nazar ke kisi wardat mein guzri

ki ek hasina-e-alam se baat mein guzri

faqat wo ek nadamat hai aur kuchh bhi nahin

aur aaj meri nadamat ka ye shadid ehsas

har ek sans mein mujh se sawal karta hai

hawas hai ishq se kitne qadam? do-chaar qadam?

kiya hai fasla un mein kai hazar qadam?

piccadily mein bhi hum yaad the tujhe ki na the

pigalle mein bhi KHalish koi dil mein thi ki na thi

wo sham thames ki ab bhi nazar mein hai ki nahin

ki jab hawas ki nazar par koi hijab na tha

wo sath-e-bahr pe raqsan jahaz ka arsha

aur us pe chaar taraf ek nur ka aalam

ki jaise barq-e-tajalli-e-tur ka aalam

walentia mein wo raqs-e-barahnagi ke tilism

teri nigah-e-tamasha ko kuchh jhijak to na thi

ye ek sawal ki jis ke hazar pahlu hain

main ek lamhe ko jab in pe ghaur karta hun

to sochta hun ki main tujh se ab malun na malun