ehtimam-e-huzuri

dil meñ hujūm-e-shauq-o-tamannā abhī se hai

āñkhoñ meñ ik surūr kī duniyā abhī se hai

hāzir nahīñ hue haiñ abhī bazm-e-dost meñ

lekin ḳhayāl-e-mahv-e-tamāshā abhī se hai

anfās meñ abhī se hai ik hashr-e-iztirāb

ehsās meñ qayāmat-e-suġhrā abhī se hai

har har ḳhayāl meñ hai abhī se bahār-e-husn

har har nazar meñ barq-e-tajallī abhī se hai

bazm-e-tasavvurāt kā aalam na pūchhiye

zoroñ pe mehr-o-māh kā dhokā abhī se hai

kitne hijāb haiñ nigah-e-shauq par abhī

aur sāmne vo chehra-e-zebā abhī se hai

saaqī nahīñ sharāb nahīñ mai-kada nahīñ

lekin fazā meñ mastī-e-sahbā abhī se hai

vo āftāb-e-husn abhī rū-ba-rū nahīñ

hastī tamām rashk-e-surayyā abhī se hai

ḳhud husn ne diyā bhī nahīñ hai javāb-e-ishq

aur ishq hai ki husn-e-sarāpā abhī se hai

vo aa.e bhī nahīñ haiñ nigāhoñ ke sāmne

hoñToñ pe ik latīf sā shikva abhī se hai

haiñ kitnī duur husn kī āġhosh-e-nāz se

lekin supurdagī kī tamanna abhī se hai

aur phir is ehtimām-e-huzūrī ke bāvajūd

kyā jaane kyoñ firāq kā ḳhatra abhī se hai

dil mein hujum-e-shauq-o-tamanna abhi se hai

aankhon mein ek surur ki duniya abhi se hai

hazir nahin hue hain abhi bazm-e-dost mein

lekin KHayal-e-mahw-e-tamasha abhi se hai

anfas mein abhi se hai ek hashr-e-iztirab

ehsas mein qayamat-e-sughra abhi se hai

har har KHayal mein hai abhi se bahaar-e-husn

har har nazar mein barq-e-tajalli abhi se hai

bazm-e-tasawwuraat ka aalam na puchhiye

zoron pe mehr-o-mah ka dhoka abhi se hai

kitne hijab hain nigah-e-shauq par abhi

aur samne wo chehra-e-zeba abhi se hai

saqi nahin sharab nahin mai-kada nahin

lekin faza mein masti-e-sahba abhi se hai

wo aaftab-e-husn abhi ru-ba-ru nahin

hasti tamam rashk-e-surayya abhi se hai

KHud husn ne diya bhi nahin hai jawab-e-ishq

aur ishq hai ki husn-e-sarapa abhi se hai

wo aae bhi nahin hain nigahon ke samne

honTon pe ek latif sa shikwa abhi se hai

hain kitni dur husn ki aaghosh-e-naz se

lekin supurdagi ki tamanna abhi se hai

aur phir is ehtimam-e-huzuri ke bawajud

kya jaane kyon firaq ka KHatra abhi se hai