ehtiraaz

kahāñ haiñ vo log

jin se bazm-e-hayāt meñ ik sarod sā thā

mohabbatoñ kā vujūd sā thā

diloñ meñ kaif-o-surūr sā thā

jo 'ijz se bhī hasīn thā vo ġhurūr sā thā

zabān jin kī guhar-fishāñ thī bayān jin kā qarār-e-jāñ thā

unhī kī ham nasl haiñ magar ham bhaTak ga.e haiñ

diloñ ko apne junūn-e-ranjish

ḳhulūs-o-mehr-o-vafā se 'aarī hai rishta-dārī

na dost-dārī na ġham-gusārī

na 'ājizī hai na inkisārī

diloñ meñ buġhz-o-hasad ke sho'le bhaḌak rahe haiñ

jhulas rahī haiñ qanā'at-o-shukr kī ridā.eñ

havas ke bādal baras rahe haiñ

diloñ meñ armān-e-zar-parastī machal rahe haiñ

sharārat-e-nafs 'urūj par hai

diloñ se rishtoñ ke fāsloñ ko baḌhā rahī hai

hamāre aslāf kī amānat

hamāre hāthoñ se jā rahī hai

vo qaum haiñ ham jo apnī tahzīb aur qadreñ gañvā rahī hai

kahan hain wo log

jin se bazm-e-hayat mein ek sarod sa tha

mohabbaton ka wujud sa tha

dilon mein kaif-o-surur sa tha

jo 'ijz se bhi hasin tha wo ghurur sa tha

zaban jin ki guhar-fishan thi bayan jin ka qarar-e-jaan tha

unhi ki hum nasl hain magar hum bhaTak gae hain

dilon ko apne junun-e-ranjish

KHulus-o-mehr-o-wafa se 'ari hai rishta-dari

na dost-dari na gham-gusari

na 'ajizi hai na inkisari

dilon mein bughz-o-hasad ke sho'le bhaDak rahe hain

jhulas rahi hain qana'at-o-shukr ki ridaen

hawas ke baadal baras rahe hain

dilon mein arman-e-zar-parasti machal rahe hain

shararat-e-nafs 'uruj par hai

dilon se rishton ke faslon ko baDha rahi hai

hamare aslaf ki amanat

hamare hathon se ja rahi hai

wo qaum hain hum jo apni tahzib aur qadren ganwa rahi hai