eid

ai jamāl-e-dost terī diid honī chāhiye

ġham-zadoñ kī bhī to āḳhir eid honī chāhiye

jab nahīñ hai aap ko tark-e-ta.alluq kā ḳhayāl

aap hī ke qaul se tardīd honī chāhiye

māntā huuñ maiñ ki be-shak qaul ke sachche haiñ aap

lekin apne ahd kī tajdīd honī chāhiye

merī jānib se sahī tahrīk-e-takmīl-e-vafā

lekin us ko aap kī tā.īd honī chāhiye

aap ne tanqīs kar dī dāstān-e-shauq kī

merā ye armān thā tanqīd honī chāhiye

har qadam par rah-rav-e-ulfat ko manzil ke liye

shauq honā chāhiye ummīd honī chāhiye

jo bayāñ iz.hār-e-harf-e-mudda.ā par ḳhatm ho

us kī bilkul muḳhtasar tamhīd honī chāhiye

ham ko bhī ma.alūm ho kin se hai raunaq bazm kī

aap ke ahbāb kī tafrīd honī chāhiye

aap jab chāheñ mire chullū maiñ talchhaT Daal deñ

kab kahā thā mahfil-e-jamshed honī chāhiye

sajda-rezī ke liye is rahguzar meñ ai jabīñ

naqsh-e-pā-e-dost kī taqlīd honī chāhiye

ai jamal-e-dost teri did honi chahiye

gham-zadon ki bhi to aaKHir eid honi chahiye

jab nahin hai aap ko tark-e-talluq ka KHayal

aap hi ke qaul se tardid honi chahiye

manta hun main ki be-shak qaul ke sachche hain aap

lekin apne ahd ki tajdid honi chahiye

meri jaanib se sahi tahrik-e-takmil-e-wafa

lekin us ko aap ki taid honi chahiye

aap ne tanqis kar di dastan-e-shauq ki

mera ye arman tha tanqid honi chahiye

har qadam par rah-raw-e-ulfat ko manzil ke liye

shauq hona chahiye ummid honi chahiye

jo bayan izhaar-e-harf-e-muddaa par KHatm ho

us ki bilkul muKHtasar tamhid honi chahiye

hum ko bhi malum ho kin se hai raunaq bazm ki

aap ke ahbab ki tafrid honi chahiye

aap jab chahen mere chullu main talchhaT Dal den

kab kaha tha mahfil-e-jamshed honi chahiye

sajda-rezi ke liye is rahguzar mein ai jabin

naqsh-e-pa-e-dost ki taqlid honi chahiye