eid milan

bichhḌe huoñ ko bichhḌe huoñ se milā.e hai

har samt eid jashn-e-mohabbat manā.e hai

insāniyat kī peñg mohabbat baḌhā.e hai

mausam har ik umiid ko jhūlā jhulā.e hai

bārish meñ khet aisī tarah se nahā.e hai

raunaq har ik kisān ke chehre pe aa.e hai

ham sab ko apne ghere meñ lene ke vāste

chāroñ taraf se ghir ke ghaTā aaj aa.e hai

haivāniyat ne ḳhuun ke dhabbe janam diye

barsāt aa ke ḳhuun ke dhabbe chhuḌā.e hai

shahzādī-e-bahār kī aamad hai baaġh meñ

har ek phuul raah meñ āñkheñ bichhā.e hai

hai kitnī pyārī pyaar bharī eid kī adā

apnā samajh ke sab ko gale se lagā.e hai

sach pūchhiye to ye bhī mohabbat kā hai subūt

jo raa.e aap kī hai vahī merī raa.e hai

bauchhāreñ aa ke detī haiñ us ko salāmiyāñ

bansī bajā bajā ke jo mela lagā.e hai

maiñ jā.ūñgā to phir kabhī vāpas na ā.ūñgā

kaalī ghaTā to har baras aa.e hai jaa.e hai

eid-ul-fitar kī vaj.h-e-sharāfat to dekhiye

har saal aa ke sab ko gale se lagā.e hai

diije duā.eñ eid kī tyauhār ko 'nazīr'

ik bhiiḌ aaj aap se milne ko aa.e hai

bichhDe huon ko bichhDe huon se milae hai

har samt eid jashn-e-mohabbat manae hai

insaniyat ki peng mohabbat baDhae hai

mausam har ek umid ko jhula jhulae hai

barish mein khet aisi tarah se nahae hai

raunaq har ek kisan ke chehre pe aae hai

hum sab ko apne ghere mein lene ke waste

chaaron taraf se ghir ke ghaTa aaj aae hai

haiwaniyat ne KHun ke dhabbe janam diye

barsat aa ke KHun ke dhabbe chhuDae hai

shahzadi-e-bahaar ki aamad hai bagh mein

har ek phul rah mein aankhen bichhae hai

hai kitni pyari pyar bhari eid ki ada

apna samajh ke sab ko gale se lagae hai

sach puchhiye to ye bhi mohabbat ka hai subut

jo rae aap ki hai wahi meri rae hai

bauchhaaren aa ke deti hain us ko salamiyan

bansi baja baja ke jo mela lagae hai

main jaunga to phir kabhi wapas na aaunga

kali ghaTa to har baras aae hai jae hai

eid-ul-fitar ki wajh-e-sharafat to dekhiye

har sal aa ke sab ko gale se lagae hai

dije duaen eid ki tyauhaar ko 'nazir'

ek bhiD aaj aap se milne ko aae hai